Jiosy nipetrake tamy ty tanà i Sosana, a Persa agne ty Estera. Taogne maro taloha izay, le nandese i Nebokadnezara boake a Jerosalema ao ty longo i Estera. Nanagne longo atao tihoe Mordekay ty Estera. Mpanompo i Ahasoerosy Mpanjaka i Persa reke, sady ie ty niteza i Estera.

Nipay valy vaovao ty Ahasoerosy tafara tatoy. Maro ty ampela soa nindesegne tama’e tao, agnisa izay ty Estera. I Estera ty finily i mpanjakay ho vali’e. Nafepé i Mordekay ty Estera mba tsy hirehake tie Jiosy reke.

I Hamana, lahilahy miavogne, ty lahibey o mpifeheo. Tea’e hiankohoke ama’e iaby o ndatio, faie tsy nimete ty Mordekay. Niboseke ty Hamana, le nikinia hamono i Mordekay. Natao’e ka ty hamonoagne ze Jiosy tamy i taney, naho fa nifanta’e tie Jiosy ty Mordekay. Hoe reke tamy i mpanjakay: ‘Vonò iaby o Jiosio fa hagnoho-doza eto.’ Hoe ty Ahasoerosy: ‘Anò ze fanta’o fa mete.’ Nimeagne fahefagne hamoake lalàna amy izay reke. Nanao lalàna ty Hamana fa hovonoegne iaby o Jiosio, amy ty faha-13 ty volagne Adara. Nahavazoho izay ty Jehovah.

Tsy nahafantatse ty fisia ze lalàna zay ty Estera. Nandefasa i Mordekay i lalànay reke sady nirahe’e ho amy i mpanjakay agne. Hoe ty Estera: ‘Naho misy ndaty tsy nasae i mpanjakay, faie mandeha mbeo, le hovonoe’e. Sady fa vola’e raike ka raho tsy nasae’e. Faie ho mbeo avao raho. Naho tondroe’e amy i tehe’ey raho le ho velogne, fa naho tsy tondroe’e raho le ho mate.’

Nandeha tan-kiririsa i mpanjakay agne ty Estera. Tinondro i mpanjakay tamy i tehe’ey reke naho fa nitrea’e, sady nagnontenea’e tie: ‘Ino ty tea’o  homeiko azo Estera?’ Hoe reke: ‘Asaeko hanao fete amako agne nareo amy i Hamana.’ Ie niavy ao iareo, le mbe nasae i Estera fagnindroe’e indraike. Nagnontenea i mpanjakay indraike reke tamy izay tie: ‘Ino ty tea’o homeiko azo Estera?’ Hoe reke: ‘Avoto zahay ragnandria, fa misy ndaty te hamono ahy naho ty fireneko.’ Hoe i mpanjakay: ‘Ia izaò?’ Hoe ty Estera: ‘I Hamana raty fagnahy.’ Niboseke vata’e ty Ahasoerosy, le nampamonoe’e ty Hamana.

Tsy nisy ndaty nahafoagne i lalàna nanoe i Hamanay ndra i mpanjakay. Tinendre i mpanjakay ho lahibey ty mpifehe’e ty Mordekay, le nimea’e fahefagne hanao lalàna vaovao indraike. Nanao lalàna hiarova o Jiosio ty vata’e ty Mordekay naho misy manafike iareo. Rese o Jiosio ty fahavalo’e tamy ty faha-13 ty volagne Adara. Nanomboke tamy izay, le nankalazaegne isan-taogne ze fandresea iareo zay.