Eseter yange due ken tsombor u Mbayuda mba hen geri u Shushan, ken tar u Pershia. Tor Nebukadinesar yange kura Mbayuda mban ken Yerusalem, yem a ve hen ijiir ne tsuaa je i lu a fa kwagh u a mar Eseter ga. Eseter yange vese sha ikyev i anmgbian na Mordekai, wan u anmgbian u baba na. Mordekai gema lu ortom u Tor Ahasueru, tor u tar u Pershia.

Tor Ahasueru yange soo u lun a torkwase u he. Nahan mbatomov nav va un a kasev mba ken tar na, mba hemban doonashe cii, Eseter kpa lu môm ker. Ken kasev mbara cii, lu Eseter tor tsua ér a lu torkwase na ye. Mordekai yange wa Eseter kwagh ér a de pasen iyol na ér un ngu Mbayuda ga.

Tor Ahasueru yange ver orgen ér a nengen sha mbatomov nav cii, iti i or shon ér Haman. Or ne nengen iyol na ér un hemba cii. Yange soo ér hanma or cii aluer nan nenge a na yô, nana ngurum nana sugh un. Kpa Mordekai venda u ngurum sughun un, nahan ishima vihi un a Mordekai je, a soo u wuan un. Va fan ér Mordekai ka Oryuda yô, a er mhen ér una wua Mbayuda mba ken tar la cica cii. A kaa a tor ér: ‘Mbayuda ka ior mba wan afer kpishi, nahan tim ve kera, tor.’ Tsô Tor Ahasueru na un zwa ér: ‘Er hanma kwagh u u soo u eren a ve cii,’ shi a na un tahav ér a wa tindi. Haman maa wa tindi ér sha iyange i uwer u Adar ua nyôr ayange 13 la yô, i wua Mbayuda mba ken tar la cii. Yehova lu nengen.

Eseter yange fa kwagh sha kwagh u tindi ne ga. Nahan Mordekai tindi a kôpi u takerada u i nger tindi shon ker la, i za tese Eseter, shi tindi loho hen a na ér: ‘Za za lam a tor.’ Eseter gema kaa ér: ‘Aluer tor yila or ga, nan gba karen zan hen a na yô, a wua nan. Tor kera yilam ga kuma ayange 30 nyian! Kpa me za. Aluer m za man a naregh gbough nagh sha a mo yô, a wuam ga. Kpa aluer a naregh ku sha a mo ga yô, a wuam.’

Tsô Eseter za nyôr ken tembeya u tor. Tor nengen a na yô, a naregh gbough nagh sha  Eseter. Eseter maa za kohol tor. Tsô tor pine un ér: ‘Ka nyi m er sha ci wou we, Eseter?’ Eseter kaa ér: ‘M soo mer we man Haman va ya nen iwer.’ Mba za nguren yan kwaghyan la yô, Eseter shi lôhô ve iwer igen. Mba za nguren yan kwagh kwa u sha uhar ne yô, tor shi pine Eseter ér: ‘Ka nyi m er sha ci wou we?’ Eseter kaa a na ér: ‘Orgen soo u wuan mo kua ior av cii. Wea lumun yô, yima se.’ Tor pine ér: ‘Ka an nan soo u wuan we?’ Eseter kaa ér: ‘Ka Haman, iferor ne!’ Yange Tor Ahasueru nyoon ishima a Haman je na zwa i wua un her ave ave je.

Kpa tindi u Haman wa la yô, lu u or môm nana fatyô u yangen un ga, tor iyol na je kpa una fatyô ga. Tsô tor ver Mordekai ér a nengen sha mbatomov nav cii, shi na un tahav ér a wa tindi u he. Tsô Mordekai wa tindi ér Mbayuda ve nôngo ityav a mbaihyomov vev, shighe u a ta num sha a ve yô. Tsô sha iyange i uwer u Adar lu ayange 13 la, Mbayuda hemba mbaihyomov vev ityav ken tar la. Hii shighe la je, Mbayuda gema eren iniongo sha werayange la ken hanma inyom, sha u umbur ityav mbi ve hemba la.