Ɛsta aki ɔna womoto l’ose Juda lakadjasɛka la Shushana osomba ɔmɔtshi wa Pɛrɛsiya. Ɛnɔnyi efula la ntondo, Nɛbukadinɛza akanya nkumbo kande oma la Jɛrusalɛma. Mɔrɔdɛkai w’ɔna ɔnango she lakakambaka laka nkumekanga Ahasuɛrɔ ka la Pɛrɛsiya mbakawodia.

Nkumekanga Ahasuɛrɔ akalange dia ntshuka womoto okina. Ekambi ande wakawela wamato woleki tshɛ elangala wa lo wodja mbidja ndo Ɛsta. Lo wamato asɔ tshɛ, nkumekanga akasɔnɛ Ɛsta dia nde monga wadɛnde. Mɔrɔdɛkai akatɛ Ɛsta diaha nde mbishola ɔnɛ nde aki ose Juda.

Hamana pami kɛmɔtshi k’otako mbaki owandji w’ɛlɔhɛ tshɛ. Nde akalangaka di’onto tshɛ mbokusamɛ. Mɔrɔdɛkai akatone dia nsala dui sɔ, ko Hamana akawomalɛ ndo akalange mbodiaka. Lam’akayeyaka Hamana dia Mɔrɔdɛkai aki ose Juda, nde akadje sheke dia ndjaka ase Juda tshɛ wa lo wodja. Nde akatɛ nkumekanga ate: ‘Ase Juda wekɔ anto wa kɔlɔ, wɛ pombaka mbadiaka.’ Ahasuɛrɔ akate ate: ‘Sala kɛnɛ tshɛ kahombayɛ nsala’ ndo akawosha lowandji la mbidja ɔlɛmbɛ ɔmɔtshi. Hamana akadje ɔlɛmbɛ wakadjangɛka anto dia ndjaka ase Juda tshɛ lushi la 13 la ngɔndɔ ka Adara. Jehowa akendaka dikambo sɔ.

Ɛsta kombeyaka dikambo di’ɔlɛmbɛ ɔsɔ. Ɔnkɔnɛ Mɔrɔdɛkai akotomɛ kɔpi k’ɔlɛmbɛ akɔ ndo akawotɛ ate: ‘Tshɔka tosawole la nkumekanga.’ Ɛsta akate ate: ‘Onto tshɛ latshɔ le nkumekanga aha la mbelamɛ, ayodiakema. Aya nshi 30 yele nkumekanga atambelɛ! Koko dimi layotshɔ. Naka nde ambotshuma danga diande, hantodiakema. Ko naka nde hantshumidiɔ, layovɔ.’

Ɛsta akatshu laka nkumekanga. Etena kakawɛnyi nkumekanga, nde akootshume danga diande. Ɛsta akatshu  le nde ndo nkumekanga akawombola ate: ‘Alangayɛ dimi kosalɛ na Ɛsta?’ Ɛsta akate ate: ‘Dimi nangaka kelɛ wɛ la Hamana lo fɛtɛ.’ Lo fɛtɛ, Ɛsta akawaelɛ nto lo fɛtɛ kekina. Lo fɛtɛ ka hende, nkumekanga akawombola nto ate: ‘Alangayɛ dimi kosalɛ?’ Ɛsta akate ate: ‘Onto ɔmɔtshi ekɔ lo nanga ndjakami dimi l’anto ami. Lam’alangayɛ otoshimbee.’ Nkumekanga akambola ate: ‘Akɔna alanga kodiaka?’ Ɛsta akakadimola ate: ‘Enda Hamana pami ka kɔlɔ kɛnɛ.’ Ahasuɛrɔ akoke nkɛlɛ k’efula ndo akadiake Hamana.

Koko ndooko onto okina lakakoke mbitola ɔlɛmbɛ wa Hamana oyadi kaanga nkumekanga. Diakɔ diele nkumekanga aketɛ Mɔrɔdɛkai owandji w’ɛlɔhɛ ndo akawosha wolo wa mbidja ɔlɛmbɛ w’oyoyo. Mɔrɔdɛkai akadje ɔlɛmbɛ wakasha ase Juda lotshungɔ la ndjaakokɛ naka wambaalɔsha. Lushi la 13 la Adara, ase Juda wakalɛndja atunyi awɔ. Oma ko etena kɛsɔ, vɔ wakasalaka fɛtɛ k’endana la wodjelo w’otshumba ɔsɔ ɔnɔnyi tshɛ.