Esita wakali muJuda wakali kukkala kuPersiya mumuunzi waShushani. Kakwiindide minyaka myiingi, nzubo zyakwe zyakabwezedwe aNebbukkadinezari kuzwa kuJerusalemu. Wakakomezegwa amwanaawisi mupati utegwa Modekkayi, alimwi wakali mubelesi waMwaami wakuPersiya Ahasuwera.

Mwaami Ahasuwera wakali kuyanduula mukayintu wakukwata. Babelesi bakwe bakamweetela basimbi boonse babotu, kuswaanizya aEsita. Akati kabasimbi boonse, mwaami wakasala Esita kuti abe mukayintu wakwe. Modekkayi wakabuzya Esita kuti atabuzyi bantu kuti wakali muJuda.

Hamani, mwaalumi wakali kulisumpula, wakali mupati wababelesi bamwaami boonse. Wakali kuyanda kuti bantu boonse bamukotamine. Pesi Modekkayi wakakaka, nkinkaako, Hamani wakali kuyanda kujaya Modekkayi. Hamani naakaziba kuti Modekkayi wakali muJuda, wakayanduula nzila zyakujaya maJuda boonse. Wakabuzya mwaami kuti: ‘MaJuda mbantu batali kabotu. Nkinkaako, beelede kujayigwa.’ Ahasuwera wakati: ‘Kochita mboyanda.’ Alubo wakamuzumizya kuti abikke mulawu. Hamani wakabikka mulawu wakali kwaamba kuti, maJuda boonse bakeelede kujayigwa mubuzuba bwachi 13 mumweezi waAda. Jehova wakali kuzibona zyoonse zyakali kuchitika.

Esita taakawuzi pe mulawu ooyu. Modekkayi wakamutumina lugwalo lwakalembedwe mulawu ooyo alimwi wakamubuzya kuti: ‘Yinka ukaambuule amwaami.’ Esita wakati: ‘Kufumbwa uuyinka kumwaami katayitidwe ulajayigwa. Ime nsinayitwa kwamazuba ali 30! Pesi ndilayinka. Ndilakonzya kupona kuti mwaami wanditambikizya nkoli yakwe pesi kuti taachita oobo ndilajayigwa.’

Esita wakayinka kung’anda yamwaami. Mwaami naakamubona, wakamutondeka ankoli yakwe. Esita wakayinka kumwaami mpawo mwaami wakabuzya kuti: ‘Uyanda kuti ndikuchitileenzi Esita? Mpawo Esita wakati:  ‘Ndikumbila kuti musike aHamani kupobwe lyangu.’ Nibakali kuchita pobwe eelyo, Esita wakabatamba lubo kuli limwi pobwe. Naakachita pobwe lyachibili, mwaami wakabuzya lubo kuti: ‘Uyanda kuti ndikuchitileenzi Esita?’ Mpawo Esita wakati: ‘Kuli muntu uyanda kundijaya abantu bamuchisi changu. Tukumbila kuti utuvune.’ Mwaami wakati: ‘Ngwani uyanda kumujaya?’ Esita wakati: ‘Muntu ooyo mubi nguHamani.’ Ahasuwera wakanyema zyakuti wakalayilila kuti Hamani ajayigwe chakufwambaana.

Pesi, taakwe muntu wakali kukonzya kumwaya mulawu wakabikkidwe aHamani, nikuba mwaami taakali kukonzya pe kuumwaya. Mwaami wakabikka Modekkayi kuti abe mupati wababelesi bakwe alimwi wakamulayilila kuti abikke mulawu mupya. Modekkayi wakabikka mulawu mupya wakali kuzumizya maJuda kuti balwane basinkondonyina. Mubuzuba bwachi 13 mumweezi waAda, maJuda akazunda basinkondonyina. Kuzwa waawo, munyaka amunyaka bakali kuchita pobwe lyakusekelela kuzunda ooku.