Ja Ester waj jun akʼix judía ti ajyi bʼa jun chonabʼ bʼa Persia sbʼiʼil Susa. Jitsan jabʼil bʼajtan, aji eluk ja spamilya bʼa Jerusalén yuja Nabucodonosor. Ja yeʼn ja aji kʼiʼuk yuja sprimo Mardoqueo, bʼa kʼot jun yaʼtijum ja mandaranum Asuero bʼa Persia.

Ja Asuero wani skʼana jun yajkʼachil ixawal. Ja yuj ja yaʼtijumiki yiʼaje ochyi ja ixuke mas tsamalik ja bʼa chonabʼi, sok cha tey ja Ester. Bʼa yibʼanal ja ixuke, ja mandaranumi jani stsaʼa ja Ester bʼa och ixawal. Ja Mardoqueo yalyabʼ ja Ester mok yal ta kʼotel judía.

Jun winik jel niwan yaʼa sbʼaj sbʼiʼil Hamán ti ajyi bʼa skʼabʼ spetsanil ja olomaliki. Ja yeʼn wani skʼana oj chʼak koʼuke sbʼaj mekʼan. Pe ja Mardoqueo mini skʼulan. Ja Hamán jel tajki sok kʼan smile. Yajni ja Hamán yabʼ ja Mardoqueo jun judío, xchapa oj chʼak smil spetsanil ja judíoʼik bʼa chonabʼi. Yala yabʼ ja mandaranumi: «Ja judíoʼiki jel xiwela sbʼaje. Tʼilani oj chʼaka mil spetsanile». Ja Asuero sjakʼa: «Kʼulan ja jas mas lek xa wila». Sok ajikan bʼa oj skʼuluk jun ley. Ja leyi yala ja bʼa skʼakʼujil 13 bʼa yixawil Adar tʼilan oj chʼak smile ja judíoʼiki. Pe ja Jyoba wani yiljel.

Ja Ester mini yabʼunejuk sbʼaja leyi. Ja Mardoqueo sjekayi jun kopya sok yalyabʼ: «Tʼilani oj waja taʼ loʼil ja mandaranumi». Ja Ester sjakʼa: «Chikan maʼ xwaj yil ja mandaranum jach mi lokubʼaluk  tʼilani oj chamuk. Sok ayxa 30 kʼakʼu me slokowon. Pe ojni wajkon. Ta sjacha ja snajbʼanteʼ sbʼa keʼna, ojni kankon sakʼan. Pe ta mi sjacha, ojni chamkon».

Ja Ester waj ja bʼa spatyoʼil snaj ja mandaranumi. Yajni yila ja mandaranum, sjacha ja snajbʼanteʼ sbʼa yeʼna. Ja Ester mojxi och, jaxa mandaranumi sjobʼo: «¿Jasa waxa kʼana, Ester?». Ja Ester sjakʼa: «Wa xkʼana oj jakan soka Hamán bʼa jun waʼelal oj jkʼuluk». Ja bʼa waʼelal jaw, ja Ester cha sloko bʼa pilan waʼelal. Jaxa bʼa xchabʼil waʼelali, ja mandaranumi cha sjobʼoyi ja Ester: «¿Jasa oja kʼanki?». Ja Ester sjakʼa: «Ayni maʼ wa xkʼana smilon ja keʼn sok ja jchonabʼi. Aʼawa pabor, koltayotikon». Ja mandaranumi sjobʼo: «¿Machun wa xyala oj smila?». Ja Ester sjakʼa: «Yeʼn ja tan mal winik it, ja Hamán». Ja Asuero jel tajki sok tixta sjeka smiljel ja Hamán.

Pe mini maʼ xbʼobʼ sjom ja ley skʼulan ja Hamán, mini ja mandaranumi. Jaxa Asuero yayi bʼa skʼabʼ ja Mardoqueo ja olomaliki sok yayi permiso bʼa skʼulajel jun yajkʼachil ley. Ja ley jaw yala oj bʼobʼ skoltay sbʼaje ja judíoʼiki yajni xwaj miljuke. Ja bʼa skʼakʼujil 13 bʼa yixawil Adar, ja chonabʼ judío skʼulane ganar ja skontraʼe. Man tyempo jaw, ja judíoʼiki och skʼintaye spetsanil ja jabʼil ja kʼakʼu jaw yuja skʼulane ganar.