Ester chatum tsumat judía tiku xlama kSusa, kachikin xalak Persia. Makgasa, mapakgsina Nabucodonosor xkakitiyanit kJerusalén xfamilia Ester. Xla makgastakli xtapuxnimat Mardoqueo, tiku xlakskujni xwanit mapakgsina Asuero xalak Persia.

Mapakgsina Asuero xlakaskin xasasti mapakgsina. Wa xlakata xlakskujnin linikgolh lakpuskatin tiku tlakg lakswan xalak ama kachikin, chu Ester na linka. Xlipaks lakpuskatin, mapakgsina laksakli Ester xlakata xpuskat xwa. Mardoqueo wanilh Ester pi niti xwanilh pi judía xwanit.

Chatum chixku tiku tlankajwa xwanit, xwanikan Hamán, wa xapuxku príncipe xlitaxtu. Xlakaskin pi putum xlakgtakilhputakgolh. Pero Mardoqueo ni xlakgtakilhputa. Hamán lu sitsilh, asta xmakgniputun. Chu akxni katsilh pi Mardoqueo judío xwanit, lakkaxwililh pi nakamakgni putum judíos xalak ama kachikin. Wanilh mapakgsina: “Judíos nitlan likatsikgo. Putum kakamakgniw”. Asuero kgalhtinalh: “Katlawa tuku wix lakpuwana pi tlan”. Chu maxkilh talakaskin pi xtlawalh limapakgsin. Uma limapakgsin xwan pi papa’ 13 xla adar, latamanin xʼamakgolh makgnikgo judíos. Pero Jehová xʼakxilhma putum tuku xlama.

Ester ni xkatsi xlakata uma limapakgsin. Wa xlakata Mardoqueo malakgachanilh xacopia chu wanilh: “Katachuwinanti mapakgsina”. Ester wa: “Putum tiku naʼan niku wi mapakgsina chu nitu tasanikanit, xlinit. Chu puxamakaw kilhtamaku mapakgsina nitu kintasaninit. Pero nakan. Komo nakilimakani xlixtokgo naklatama, chu komo ni, nakni”.

Ester alh niku xwi mapakgsina. Akxni mapakgsina akxilhli, lakglimakalh xlixtokgo. Ester lakgtalakatsuwilh niku xwi, chu mapakgsina kgalhskilh: “¿Tuku  lakaskina Ester?”. Xla kgalhtinalh: “Katata Hamán ktaway nema naktlawa”. Ktaway, Ester kawanilh pi xʼamparakgolh kʼatanu taway. Chu akxni xlimakgtiy xwayamakgolh, mapakgsina kgalhskimpara Ester: “¿Tuku lakaskina?”. Xla wa: “Wi tiku kinkamakgniputunan akit chu kinkachikin. Katlawa litlan, kakinkalakgmaxtu”. Mapakgsina kgalhskininalh: “¿Tiku makgniputunan?”. Xla wa: “Wa uma chixku tiku lixkajni likatsi, Hamán”. Asuero lu sitsilh chu limapakgsinalh pi xmakgnika Hamán.

Niti la xlakxtlawa uma limapakgsin nema xtlawanit Hamán, nipara wa mapakgsina. Wa xlakata mapakgsina tlawalh pi Mardoqueo xpuxku príncipes xlitaxtulh chu maxkilh talakaskin pi xtlawalh xasasti limapakgsin. Uma limapakgsin xwan pi judíos ni xtamastakgolh akxni xkatalachipaka. Wa xlakata papa’ 13 xla adar, kachikin judíos makgatlajakgolh xtalamakgasitsinkan. Lata ama kilhtamaku, judíos tsukukgolh lipaskuajnankgo kata kata xlakata xtlajanankgonit.