Estere a a ri nhwanyana wa Muyuda loyi a a tshama ePeresiya emutini wa Xuxani. Malembe yo tala emahlweni ka kwalaho, ndyangu wa ka vona wu tekiwe eYerusalema hi Nebukadnetsara. U kurisiwe hi buti wakwe Mordekayi loyi a a ri nandza wa Hosi Ahasuwerusi wa le Peresiya.

Hosi Ahasuwerusi a a lava nsati lontshwa. Malandza yakwe ma n’wi tisele vavasati vo saseka swinene lava a va ri kona etikweni ku katsa na Estere. Eka vavasati volavo hinkwavo, hosi yi hlawule Estere leswaku a va nsati wa yona. Mordekayi u byele Estere leswaku a nga vuli leswaku yena i Muyuda.

Hamani wanuna loyi a a tikukumuxa a a vekiwe leswaku a va holobyenkulu. A a lava leswaku vanhu hinkwavo va n’wi khinsamela. Mordekayi a nga pfumelanga ku endla tano, kutani sweswo swi hlundzukise Hamani lerova a lava ku n’wi dlaya. Loko Hamani a kuma leswaku Mordekayi i Muyuda, u endle kungu ro dlaya Vayuda hinkwavo etikweni. U byele hosi a ku: ‘Vayuda va ni khombo; u fanele u va herisa.’ Ahasuwerusi u te: ‘Endla leswi u lavaka ku swi endla,’ a tlhela a n’wi nyika vulawuri byo veka nawu. Hamani u veke nawu wa leswaku Vayuda hinkwavo va fanele va dlayiwa hi siku ra vu-13 ra n’hweti ya Adara. Yehovha a a ri ku swi voneni hinkwaswo leswi a swi endleka.

Estere a a nga tivi nchumu hi nawu wolowo. Kutani Mordekayi u n’wi rhumele kopi ya wona ivi a ku: ‘Famba u ya vulavula ni hosi hi mhaka leyi.’ Estere u te: ‘Munhu un’wana ni un’wana loyi a yaka eka hosi yi nga n’wi vitananga u ta dlayiwa. Ndzi ni masiku ya 30 hosi yi nga si ndzi vitana! Hambiswiritano ndzi ta ya. Loko yo ndzi tlakusela nhonga ya vuhosi a ndzi nge dlayiwi. Kambe loko yo ka yi nga yi tlakusi ndzi ta dlayiwa.’

Estere u ye endhawini leyi nga rivala ya hosi. Loko hosi yi n’wi vona, yi tlakusele nhonga ya yona ya vuhosi ehenhla. Estere u ye eka yona ivi hosi yi n’wi vutisa yi ku: ‘I yini lexi u lavaka ndzi ku endlela xona, Estere?’  Hiloko a ku: ‘Ndza ku rhamba wena na Hamani leswaku mi ta enkhubyeni.’ Loko va ri enkhubyeni wolowo, Estere u tlhele a va rhamba eka nkhuvo wun’wana. Enkhubyeni wa vumbirhi, hosi yi tlhele yi n’wi vutisa yi ku: ‘I yini lexi u lavaka ndzi ku endlela xona?’ U te: ‘Ku ni loyi a lavaka ku dlaya mina ni varikwerhu. Ndzi kombela u hi ponisa.’ Hiloko hosi yi vutisa yi ku: ‘I mani loyi a lavaka ku mi dlaya?’ Estere u te: ‘I Hamani loyi wo homboloka.’ Sweswo swi hlundzukise Ahasuwerusi lerova a lerisa leswaku Hamani a dlayiwa hi nkarhi wolowo.

Kambe a ku nga ri na loyi a a ta cinca nawu lowu Hamani a wu vekile, hambi ku ri hosi hi yoxe. Kutani hosi yi veke Mordekayi leswaku a va holobyenkulu yi tlhela yi n’wi nyika matimba yo veka nawu lowuntshwa. Mordekayi u veke nawu lowu a wu pfumelela Vayuda leswaku va tilwela loko va hlaseriwa. Hi siku ra vu-13 ra n’hweti ya Adara, Vayuda va hlule valala va vona. Ku sukela kwalaho va ye emahlweni va tlangela ku hlula koloko lembe ni lembe.