Esiteri akaba ali mwisiki Muyudaaya ayaikaraga omu rubuga orukwetwa Susani orukaba ruli omu Bukama bwa Buperesi. Emyaka ey’enyuma, abanyabuzaale ba Esiteri bakaba bamu ha bantu abatwairwe Omukama Nebukadeneza omu bunyagwa kuruga Yerusalemu. Kandi Esiteri akakuzibwa mugenzi we arukwetwa Morodekai ayakoraga nk’omuheereza w’Omukama Ahasuero owa Buperesi.

Omukama Ahasuero akaba n’aserra omugo ondi ow’okuswera. Abaheereza be bakamuletera abakazi abasemiire muno otwaliremu na Esiteri. Omu bakazi banu boona, Omukama Ahasuero akakomamu Esiteri kuba omugo. Hanyuma, Morodekai akatererra Esiteri kutagambira omuntu wena nk’oku ali Muyudaaya.

Omusaija ow’emyehembo ayayetwaga Hamani nuwe akaba ali mukuru w’ababiito boona. Kandi yagonzaaga buli muntu amwinamire. Baitu uwe Morodekai akanga kumwinamira, kandi kinu kikabihiza muno Hamani yagonza n’okumwita. Hamani obuyakizoire ngu Morodekai musaija Muyudaaya, akakora enteekaniza ey’okwita Abayudaaya boona abakaba bali omu ihanga eri. Akagambira omukama ati: ‘Abayudaaya bantu babi muno; nahabweki osemeriire kubamaraho boona.’ Omukama Ahasuero akamugarukamu ati: ‘Bakole kyona ekyorukwenda,’ kandi akamuha n’obusobozi obw’okukora ekiragiro ky’okwita Abayudaaya. Hamani akakora ekiragiro ekihyaka ekikaba nikiha abantu obusobozi bw’okwita Abayudaaya boona ebiro 13, okwezi kwa Adara. Baitu Yahwe akaba narora byona ebikaba nibigenda omu maiso.

Esiteri uwe akaba ataine eky’amanyire ha kiragiro kinu. Morodekai akamusindikira ekiragiro kandi yamugambira ati: ‘Genda, ogambire omukama.’ Esiteri akagarukamu Morodekai ati: ‘Buli muntu wena arukugenda hali omukama ataraliziibwe, asemeriire kwitwa. Kandi omukama takandaliize kumara ebiro 30. Baitu niinyija kugenda. Obwaranyimukiza omwigo gwe, tindukwija kufa kandi obwaraaba atagwimukize ninyija kufa.’

Esiteri akagenda omu nju y’omukama, kandi omukama obuyamurozere akamwimukiza omwigo gwe. Esiteri obuyamwiriire haihi, omukama akamukaguza ati: ‘Kiki  ekyorukugonza nkukorre Esiteri?’ Esiteri akamugarukamu ati: ‘Ningonza kubaraaliza iwe na Hamani ha bugenyi.’ Obu bakaba bali ha bugenyi, Esiteri akongera yabaraaliza omurundi gwakabiri ha bugenyi obundi. Ha bugenyi obwakabiri, omukama akongera yakaguza Esiteri ati: ‘Kiki eky’orukugonza nkukorre?’ Esiteri akamugarukamu ati: ‘Haroho omuntu arukugenda kunyita hamu n’abantu bange. Caali tujune.’ Omukama Ahasuero akamukaguza ati: ‘Noha arukugonza kukwita?’ Esiteri akagarukamu ati: ‘Omusaija ogu omubi, Hamani.’ Omukama Ahasuero akabiihirwa muno kandi aho naho akaragira ngu Hamani bamwite.

Kaabe omukama rundi omuntu wena, busaho ow’akaba n’asobora kwihaho ekiragiro kya Hamani. Nahabweki, Omukama Ahasuero akagarra Morodekai omu kiikaro kya Hamani kandi yamuha obusobozi obwokukora ekiragiro ekindi ekihyaka. Morodekai akakora ekiragiro ekihyaka ekyaikiriize Abayudaaya kwerwanaho obu barabatahirra. Ebiro 13 okwezi kwa Adara, Abayudaaya bakasingura abanyanzigwa baabo. Kuruga obu, buli mwaka Abayudaaya bakaikaraga nibajaguza obusinguzi bunu.