Эсфир — Персияның Сузы хоорайга чурттап чораан еврей уруг-дур. Ону Персияның хааны Ахашвероштуң чалчазы болур төрел акызы Мардохей кижизиткен.

Ахашверош бодунга чаа кадын дилеп эгелээн. Ол черниң эң чараш уругларын эккээрге, оларның аразынга Эсфир база турган. Ол хаанның сеткилинге дыка кирген, ынчангаш ол ону кадыны кылып алган. Мардохей Эсфирни еврей мен деп кымга-даа ыыттавазын дилээн.

Дүжүметтерниң даргазы өрү көрдүнер Аман шупту улус аңаа мөгейзин деп күзеп турган. Ынчалза-даа Мардохей аңаа мөгейбеске, Аман аажок хорадап, ону өлүрерин күзей берген. Аман Мардохейни еврей деп билип алгаш, ол черде шупту еврейлерни узуткаар деп бодап алган. Ол хаанга: «Еврейлер — айыылдыг чон-дур, оларны узуткаар болза эки» — дээн. Хаан: «Бодап алганың дег кыл» — деп харыылаан. Хаанның чөпшээрели-биле Аман чуртта шупту еврейлерни адар айның 13-те узуткаар деп хоойлу үндүрген. Ол бүгүнү Иегова көрүп турган.

Эсфир ол хоойлу дугайында чүнү-даа билбээн. Ынчангаш Мардохей ооң хоолгазын чоргускаш: «Баргаш, хаан-биле чугаалажып көрем» — деп дилээн. Эсфир аңаа харыылаан: «Хаанче чөпшээрел чок кирген кижи өлүртүр. А ол мени 30 хүн кыйгырбаан. Ынчалза-даа баар мен. Бир эвес ол менче алдын даянгыыжын айтыптар болза, дириг артар мен. Айытпас болза, мени өлүмге шиидер».

Эсфир хаанның ордузунче кирип келген. Хаан даянгыыжын олче айтыпкан. «Эсфир, сеңээ чүнү кылып  болур мен?» — деп, хаан айтырган. Ол аңаа: «Аман биле сени байырлалче чалап тур мен» — дээн. Ол байырлалга Эсфир оларны база катап чалаан. Ийиги байырлал үезинде хаан айтырган: «Сеңээ чүнү кылып бээйн?» Эсфир: «Бир кижи мени болгаш мээң чонумну өлүрер деп тур. Бисти камгалап көрем» — деп хаандан дилээн. Хаан ол кижини Аман деп билип кааш, ону өлүмге шиидип каан.

Ынчалза-даа Аманның үндүрген хоойлузун кым-даа, хаан безин, өскертип шыдавас турган. Ынчангаш хаан Мардохейни дүжүметтерниң чагырыкчызы кылып кааш, аңаа хоойлу үндүрер эргени берген. Мардохей еврейлер боттарын камгалап болур деп чаа хоойлу үндүрүп каан. Адар 13-те еврейлер дайзыннарын удуп алган. Ол үеден эгелээш, олар ол тиилелгени байырлаар апарган.