Ester ufeko umue u Yudea okuti, wa kala ko Persia volupale luo Siusana. Kanyamo amue konyima epata lia Ester liopiwile ko Yerusalãi la Nevukandesa. Ester wa tatiwa lepalume liaye Mordekai, ukuenje umue wa Soma Ahasuero wo ko Persia.

Soma Ahasuero wa yonguile nasoma ukuavo. Akuenje va nena kokuaye akãi va fina calua vo vofeka oku kongelamo Ester. Pokati kakãi vaco, soma wa nõla Ester oco a kale nasoma. Mordekai wa lungula Ester oco ka ka lisitulule okuti u Yudea.

Ulume umue ukuacituwa cepela o tukuiwa hati Hamana, wa kala usongui wolombuale viosi. Eye wa yonguile okuti omanu vosi vo kekamẽla. Mordekai ka tavele oku ci linga kuenje Hamana wa temẽle calua okuti wa yonguile oku u ponda. Eci Hamana a limbuka okuti Mordekai wa kala u Yudea, wa linga esokiyo lioku ponda va Yudea vosi va kala vofeka. Eye wa sapuila soma hati: ‘Va Yudea va koka ohele, ove o sukila oku va imũla.’ Ahasuero wa popia hati: ‘Linga ndeci wa panga,’ kuenje wo wĩha omoko yoku linga ocihandeleko cimue. Hamana wa linga ocihandeleko cimue ca eciwa komanu coku ponda va Yudea vosi keteke 13 kosãi ya Adara. Yehova wa kala oku mola ovina viaco.

Ester ka kũlĩhĩle ocihandeleko caco. Omo liaco, Mordekai wa tuma onepa yimue yocihandeleko caco ku Ester kuenje wo sapuila hati: ‘Kuende, ka sapele la soma.’ Ester wa popia hati: ‘Omunu wosi okuti enda ku soma, pole, ka lalekiwile o pondiwa. Soma wa tẽlisa ale 30 koloneke okuti ka ndi vilikiya! Pole, ame ngenda. Nda eye wa ilika ohunya yaye, ndi kala lomuenyo. Puãi, nda ka ci lingile ndi fa.’

Ester wa enda kelombe lia soma. Eci soma o mola wo wilika lohunya yaye. Ester wamẽla kokuaye kuenje soma wo pula hati: ‘Nye ndi sukila oku ku lingila a Ester?’ Ester wa tambulula hati: ‘Ndi yongola oku laleka ove la Hamana kocipito cimue.’ Kocipito caco, Ester wa va laleka onjanja yavali  kocipito cikuavo. Vokuenda kuocipito caco cavali, soma wa pula vali Ester hati: ‘Nye ndi sukila oku ku lingila?’ Ester wa tambulula hati: ‘Omunu umue o kasi oku sandiliya oku ndi ponda kuenda oku ponda epata liange. Linga ohenda tu popele.’ Soma wa pula hati: ‘Helie o yongola oku vu pondi?’ Ester wa tambulula hati: ‘Ulume waco ondingaĩvi Hamana.’ Ahasuero wa temẽle calua okuti wa yonguile oku ponda Hamana vepuluvi liaco.

Pole, lomue wa ponduile oku imũla ocihandeleko ca Hamana ndaño muẽle soma. Kuenje soma wa kapa Mordekai oco a kale usongui wolombuale kuenda wo wĩha omoko yoku soneha ocihandeleko cokaliye. Mordekai wa soneha ocihandeleko cimue ca ecelela okuti va Yudea va li teyuila eci va va katukila. Keteke 13 kosãi ya Adara va Yudea va kundula ovanyali vavo. Kuenje ovo va enda oku ivaluka eyulo liaco unyamo lunyamo.