Esitere o vha e musidzana wa Muyuda we a vha a tshi dzula Peresia ḓoroboni ya Susani. Muṱa wahawe wo vha wo dzhiiwa nga Nebukadanetsara Yerusalema miṅwaha minzhi yo fhelaho. O aluswa nga muzwala wawe a no pfi Maradokai, we a vha e mushumeli wa Ahasiverosi Khosi ya Peresia.

Khosi Ahasiverosi o vha a tshi khou ṱoḓa mufumakadzi muswa. Vhashumeli vhawe vha mu ḓisela vhasidzana vho nakesaho kha ḽeneḽo shango, u katela na Esitere. Kha vhasidzana vhoṱhe, khosi ya nanga Esitere uri a vhe mufumakadzi wayo. Maradokai a vhudza Esitere uri a songo vhuya a zwi amba uri u Muyuda.

Muṅwe munna wa u ḓikukumusa we a vha a tshi pfi Hamani o vha e muhulwane wa vhakololo vhoṱhe. O vha a tshi ṱoḓa uri vhathu vhoṱhe vha mu gwadamele. Maradokai a hana, nahone Hamani a sinyuwa nahone a ṱoḓa u mu vhulaha. Musi Hamani a tshi zwi wana uri Maradokai ndi Muyuda, a ita maano a u vhulaha Vhayuda vhoṱhe kha ḽeneḽo shango. A amba na khosi a ri: ‘Vhayuda vha khombo; vha fanela u vha fhelisa.’ Ahasiverosi a ri: ‘Itani zwine na nga kona u zwi ita,’ nahone a mu fha maanḓa a u vhea mulayo. Hamani a vhea mulayo we wa vhudza vhathu uri vha vhulahe Vhayuda vhoṱhe nga ḓuvha ḽa vhu-13 ḽa ṅwedzi wa Adara. Yehova o vha o sedza.

Esitere o vha a sa ḓivhi wonoyo mulayo. Maradokai a mbo ḓi mu rumela kopi yawo a mu vhudza a ri: ‘Tshimbilani ni yo amba na khosi.’ Esitere a ri: ‘Ane a ya ha khosi a songo vhidziwa u a vhulahwa. Ndi na maḓuvha a 30 khosi i sa athu u mbidza! Fhedzi ndi ḓo ya. Arali ya imisa thonga yayo, ndi ḓo tshila. Ya sa i imisa, ndi ḓo fa.’

Esitere a ya muṱani wa khosi. Musi khosi i tshi mu vhona ya imisa thonga yayo. Esitere a ya khayo, nahone khosi ya mu vhudzisa ya ri: ‘Ni khou ṱoḓa mini, Esitere? Ene a ri: ‘Ndi ṱoḓa u vha ramba tshimimani na Hamani.’  Musi vhe kha tshenetsho tshimima, Esitere a vha ramba u ḓa kha tshiṅwe tshimima tsha vhuvhili. Kha tshimima tsha vhuvhili, khosi ya dovha ya vhudzisa ya ri: ‘Ndi ni itele mini?’ Esitere a ri: ‘Hu na ane a ṱoḓa u mbulaha na vhathu vhahashu. Ri khou humbela vha ri tshidze.’ Khosi ya mu vhudzisa ya ri: ‘Ndi nnyi ane a ṱoḓa u ni vhulaha?’ Esitere a ri: ‘Ndi hoyu munna muvhi Hamani.’ Ahasiverosi a sinyuwa lwe a ri Hamani a mbo ḓi vhulahwa tshenetsho tshifhinga.

Fhedzi a huna we a vha a tshi nga fhelisa mulayo wa Hamani, na khosi yo vha i sa zwi koni. Khosi ya mbo ḓi ita uri Maradokai a vhe muhulwane wa vhakololo nahone ya mu fha maanḓa a u vhea mulayo muswa. Maradokai a vhea mulayo we wa tendela Vhayuda u ḓilwela musi vha tshi lwiwa navho. Nga ḓuvha ḽa vhu-13 ḽa Adara, Vhayuda vha kunda maswina avho. U bva nga tshenetsho tshifhinga, Vhayuda vha pembelela gundo ḽavho ṅwaha muṅwe na muṅwe.