Hi Ester usa nga Judio nga naukoy ha Persia ha syudad han Susan. Damu ka tuig antes hito, an iya pamilya gindara nga bihag ni Nabukodonosor tikang ha Jerusalem. Ginpadaku hiya han iya patod nga hi Mordekay nga surugoon ni Ahasuerus nga hadi han Persia.

Karuyag ni Hadi Ahasuerus magkaada bag-o nga rayna. Gindara ha iya han iya mga surugoon an pinakamahusay nga mga babaye ha iya nasasakopan, upod na hi Ester. Ha tanan nga babaye, hi Ester an napili han hadi. Ginsidngan hi Ester ni Mordekay nga diri hiya magsumat nga Judio hiya.

Usa nga hambog nga lalaki nga Haman an ngaran an lider han mga prinsipe. Karuyag niya magyukbo ha iya an ngatanan nga tawo. Pero hi Mordekay nadiri pagyukbo. Nasina gud hi Haman salit gin-ikaparatay niya hi Mordekay. Han hinbaroan niya nga Judio hi Mordekay, nagplano hiya nga ipapatay an ngatanan nga Judio ha nasasakopan han Persia. Nagsiring hiya ha hadi: ‘An mga Judio diri nasunod ha imo; kinahanglan mo hira pamatayon.’ Hi Ahasuerus nagsiring: ‘Buhata an karuyag mo buhaton ha ira,’ ngan gintagan hiya hin awtoridad nga maghimo hin balaud. Hi Haman naghimo hin balaud nga pamatayon an ngatanan nga Judio ha ika-13 han bulan han Adar. Pero nakikita ni Jehova an nahitatabo.

Diri maaram hi Ester hito nga balaud. Salit ginpadad-an hiya ni Mordekay hin kopya hito ngan nagsiring: ‘Pakadto ha hadi ngan pakiistorya ha iya.’ Hi Ester nagsiring: ‘Papatayon an bisan hin-o nga kumadto ha hadi nga waray ipatawag. Trenta ka adlaw na nga waray ako ipapatawag han hadi! Pero sige, makadto ako. Kon iunat niya ha akon an iya setro, mabubuhi ako. Pero kon diri, mamamatay ako.’

Hi Ester kumadto ha bungsaran han hadi. Han nakita hiya han hadi, igin-unat han hadi an iya setro. Humirani hi Ester, ngan an hadi nagpakiana: ‘Ano an imo tuyo, Ester?’  Hiya nagsiring: ‘Iimbitaron ko unta kamo ni Haman ha usa nga panagtawo.’ Durante han ira pangaon, gin-imbitar utro hira ni Ester ha usa pa nga panagtawo. Ha ikaduha nga panagtawo, nagpakiana utro an hadi kan Ester: ‘Ano an imo hangyo?’ Hiya nagsiring: ‘May nag-iikaparatay ha akon ngan ha akon katawohan. Alayon buligi kami.’ An hadi nagpakiana: ‘Hin-o?’ Hiya nagsiring: ‘Ini nga maraot nga hi Haman.’ Nasina gud hi Ahasuerus salit iginpapatay dayon niya hi Haman.

Pero waray puydi makagbag-o han balaud nga ginhimo ni Haman, bisan an hadi. Salit hi Mordekay ginhimo han hadi nga lider han mga prinsipe ngan gintagan hin awtoridad nga maghimo hin bag-o nga balaud. Hi Mordekay naghimo hin balaud nga nagtutugot ha mga Judio nga depensahan an ira kalugaringon kon atakehon hira. Han ika-13 han Adar, napirde han mga Judio an ira mga kaaway. Tikang hito, kada tuig nira iginsiselebrar ini nga kadaogan.