Esitele jwaliji msikana jwa Ciyuda juŵatamaga m’cilambo ca Pelesiya mumsinda wa Susani. Jwalakwe jwatamaga m’cilamboci ligongo lyakuti acinangolo ŵakwe ŵajigalidwe ukapolo ni Nebukadinesala kutyocela ku Yelusalemu. Jwalakwe jwaleledwe ni asiŵani ŵakwe ŵakolanjidwa Moledekayi. Asiŵani ŵakweŵa ŵatumicilaga Mwenye Ahasiwelo ŵa ku Pelesiya.

Mwenye Ahasiwelo ŵasakaga kulombela jwamkongwe jwine. M’yoyo ŵakutumicila ŵakwe ŵamjigalile acakongwe ŵakusalala mnope ŵa m’cilambomo. Esitele ŵalijisoni m’likuga lya acakongweŵa. Nambo pa acakongwe wosopewo, mwenye ŵasagwile Esitele kuti aŵe ŵamkwakwe. Moledekayi ŵamsalile Esitele kuti akalijuwula kuti jwaliji m’Yuda.

Nambo paliji mundu jwine jwakulikwesya lina lyakwe Hamani juŵaliji mlongola jwa nduna sya m’cilamboco. Jwalakwejo jwasakaga kuti ŵandu wosope amtindiŵalileje. Nambo Moledekayi jwakanile kumtindiŵalila jwalakwejo. M’yoyo Hamani jwatumbile mnope mwamti jwalingenye yakuti Moledekayi awulajidwe. Hamani ali ayimanyi kuti Moledekayi jwaliji M’yuda, jwalingenyesoni yakuti ŵawulaje Ayuda wosope m’cilamboco. Jwalakwe jwasalile mwenye kuti, ‘Ayuda ali ŵandu ŵakogoya, akusosekwa kwawulaga.’ Ni mwenye Ahasiwelo ŵatite, ‘Mtende yiliyose yamkusaka.’ Soni ŵampele macili gakutamilikasya lilamusi panganiji. M’yoyo Hamani jwalingenye lilamusi ni ŵasalile ŵandu kuti palisiku lya 13 lya mwesi wa Adala, Ayuda wosope akusosekwa kuwulajidwa. Nambo Yehofa ŵayiwonaga yeleyi.

Esitele nganamanyililaga ya lilamusili. M’yoyo Moledekayi ŵamtumicisye cikalata cacasalaga ya lilamusili, soni ŵamsalile kuti, ‘Mjawule mkaŵecetane ni mwenye.’ Esitele jwatite, ‘Mundu jwakwawula kwa mwenye mkanam’ŵilanje akusawulajidwa. Pamasile masiku 30 mwenye mkanambilanje. Nambo cinjawule. Naga cakalanjile unejo ni ndodo, nikuti ngasimbulajidwa. Naga ngasatenda yeleyo, nikuti cingawulajidwe.’

M’yoyo Esitele jwapite kunyumba ja mwenye. Mwenye ŵala paŵam’weni Esitele, ŵanyakwile ndodo jawo ni kumlanjila.  Jwalakwe jwajawile paŵaliji mwenyewo, ni mwenye ŵala ŵam’wusisye kuti, ‘Ana mkusaka namtendele cici Esitele?’ Jwalakwejo jwatite, ‘Ngusaka kuti wawojo ni Hamani ayice kucindimba liguloli.’ Paŵaliji pacindimbaco, Esitele ŵaŵendilesoni mwenyewo ni Hamani kuti casimanikwesoni pa cindimba cine. Pacindimba caŵilici, mwenyewo ŵam’wusisye Esitele kuti, ‘Ana mkusaka namtendele cici?’ Jwalakwe jwatite, ‘Mundu jwine akusaka ambulaje yalumo ni ŵandu ŵa mtundu wangu. Conde atukulupusye.’ Mwenye ŵala ŵawusisye kuti, ‘Ŵani ŵakusaka kum’wulaga?’ Esitele jwatite, ‘Ali Hamani mundu jwakusakala.’ Mwenye Ahasiwelo ŵatumbile mnope mwamti ŵalamwile kuti Hamani awulajidwe ndaŵi jijojo.

Nambo mwenye atamose ŵanduwo ngamkanapakombola kutyosya lilamusi lyaŵatamilikasisye Hamani. M’yoyo mwenye ŵam’ŵisile Moledikayi kuŵa mlongola jwa nduna sya m’cilamboco, soni ŵampele macili gakupanganya lilamusi line lyasambano. Moledikayi jwatamilikasisye lilamusi lyakwakamucisya Ayuda kulicenjela kwa acimmagongo ŵawo. Palisiku lya 13 lya mwesi wa Adala wula Ayuda ŵagomece acimmagango ŵawo. Kutyocela pandaŵi jeleji, caka cilicose ŵatendaga cindimba cakusangalalila kupundaku.