Estereʼ juntúul x-chʼúupal judía kajaʼan kaʼach Susa, junpʼéel kaaj yaan tu luʼumil Persia. Ku taal tiʼ u chʼiʼibal junpʼéel familia kajaʼan kaʼach Jerusalén bisaʼaboʼob palitsiltbil tumen Nabucodonosor. Estereʼ nojochkíintaʼab tumen Mardoqueo, u primo, letiʼeʼ ku meyajtik kaʼach Asuero, u reyil Persia.

Rey Asueroeʼ u kʼáat kaʼach ka yanak juntúul túumben reina. Le oʼolal le máaxoʼob meyajtikoʼ tu bisoʼob tu táan le rey le koʼoleloʼob maas kiʼichpanoʼob yanoʼob teʼ luʼumiloʼ, juntúul tiʼ letiʼobeʼ Ester. Tiʼ tuláakal le x-chʼúupalaloʼoboʼ, le reyoʼ tu yéeyaj Ester utiaʼal u beetik u reinail. Chéen baʼaleʼ Mardoqueoeʼ tu yaʼalaj tiʼ Ester maʼ u yaʼalik tiʼ mix máak wa judía.

Hamán, juntúul máak jach nojbaʼal u taaskubaeʼ, u nojchil kaʼach tuláakal le principeʼoboʼ. Letiʼeʼ u kʼáat kaʼach ka chinlak tuláakal máak tu táan, chéen baʼaleʼ Mardoqueoeʼ maʼatech u beetik. Hamaneʼ jach pʼuʼujeʼ ka taakchaj u kíimsik. Le ka tu yojéeltaj Hamán judío Mardoqueoeʼ, tu tuklaj bix jeʼel u láaj kíimsik le judíoʼob kajaʼanoʼob Persiaoʼ. Letiʼeʼ tu yaʼalaj tiʼ le reyoʼ: ‹Le judíoʼoboʼ kʼasaʼan máakoʼob. Unaj u láaj kíimsaʼaloʼob›. Asueroeʼ tu yaʼalaj: ‹Beet le baʼax maas maʼalob a wilkoʼ›. Le rey túunoʼ tu chaʼaj u beetik junpʼéel ley. Teʼeloʼ ku yaʼalikeʼ tu kʼiinil 13 tiʼ u mesil adareʼ le máakoʼoboʼ unaj u kíimskoʼob le judíoʼoboʼ. Chéen baʼaleʼ Jéeobaeʼ táan kaʼach u yilik baʼax ku yúuchul.

Estereʼ maʼ u yojel kaʼach wa tsʼoʼok u beetaʼal le leyaʼ. Le oʼolal Mardoqueoeʼ tu túuxtajtiʼ junpʼéel u copiaileʼ ka tu yaʼalajtiʼ: ‹Kʼaʼabéet a tʼaan yéetel le reyoʼ›. Estereʼ tu yaʼalajtiʼ: ‹Jeʼel máaxak ka xiʼik u yil le rey wa maʼ letiʼ aʼalmiltiʼeʼ yaan u kíimsaʼal. Tsʼoʼoleʼ tsʼoʼok 30 kʼiinoʼob maʼ u yaʼalten ka xiʼiken tu yiknaliʼ. Kex beyoʼ yaan in bin. Wa ku tichʼik u xóolteʼ tin tojileʼ yaan u seguer in kuxtal, chéen baʼaleʼ wa maʼ tu beetkeʼ yaan in kíimsaʼal›.

 Estereʼ bin tu táankabil u palacio le reyoʼ. Ka ilaʼab tumen le reyoʼ tu tichʼaj u xóolteʼ tu tojil. Estereʼ náatsʼeʼ ka aʼalaʼabtiʼ tumen le reyoʼ: ‹Ester, ¿yaan wa baʼax a kʼáat?›. Letiʼeʼ tu núukajtiʼ: ‹In kʼáat ka taalakech yéetel Hamán tiʼ junpʼéel janal ken in beete›. Le tiaʼanoʼob teʼ janaloʼ, Estereʼ tu kaʼa invitartoʼob utiaʼal uláakʼ janal. Le ka binoʼob tu kaʼatéenoʼ, le reyoʼ tu kaʼa aʼalaj tiʼ Ester: ‹¿Yaan wa baʼax a kʼáat?›. Letiʼeʼ tu yaʼalaj: ‹Yaan máax taak u kíimsken yéetel taak u xuʼulsik in kaajal. Much salvartoʼoniʼ›. Le reyoʼ tu kʼáataj: ‹¿Máax taak u kíimskech?›. Letiʼeʼ tu yaʼalaj: ‹Letiʼe kʼasaʼan Hamanaʼ›. Asueroeʼ jach pʼuʼujeʼ ka tu túuxtaj kíimsbil Hamán.

Chéen baʼaleʼ mix máak jeʼel u páajtal u luʼsik kaʼach le ley tu beetaj Hamanoʼ, mix le reyoʼ. Le oʼolal le reyoʼ tu tsʼáaj Mardoqueo u beet u nojchil le principeʼoboʼ yéetel tu yaʼalajtiʼ ka u beet junpʼéel túumben ley. Le leyaʼ ku yaʼalikeʼ le judíoʼoboʼ jeʼel u páajtal u defenderkubaʼob ken taalak baʼateltbiloʼobeʼ. Tu kʼiinil 13 tiʼ adareʼ le judíoʼoboʼ tu ganartaj u enemigoʼob. Desde teʼ kʼiinoʼ cada añoeʼ ku kʼiinbeskoʼob le baʼax úuchaʼ.