Oro ma romo 70 ukadhu niai ma nyithindho ma pol mir Israel gidok i Yerusalem, ento fodi asu jumoko m’i kindgi gidong’ pi nikwo i kabedo ma tung’ tung’ mi ker mi Perse. Ng’atu acel m’i kindgi ubino jalam ma nyinge Ezra, m’ugam uponjo Cik pa Mungu ni dhanu. Ezra uwinjo nia dhanu mi Yerusalem gibino woro ngo Cik, pieno emito ecidhi wek kara ekonygi. Artacacta m’ubimo mi Perse uyero ire kumae: ‘Mungu udwoki riek kara iponj Cik pare ni dhanu. Cidhi man icok dhanu ceke ma gibemito gicidh kudi.’ Ezra ugam ucoko dhu dhanu ceke ma gimito gidoki i Yerusalem. Gikwayu Yehova ugwokgi ma ber i woth ma bor ma gibiwotho, e gigam gicoko woth.

I ng’ei dwi ang’wen gigam gitundo i Yerusalem. Judongomawijo ma gibino kuca giwacu ni Ezra kumae: ‘Nyithindho mir Israel giworo ngo Yehova, gigamu mon ma woro mungu m’araga.’ Ezra ugam utimo ang’o? I wang’ dhanu keca, Ezra ugam urum man erwo kumae: ‘Yehova, itimo iwa lembe dupa dit, ento wadubo iri.’ Dhanu gigam giyewo dubo migi, re fodi asu gibino mediri ku timo lembe m’atira ngo. Ezra ung’io judongo man jupoklembe kara giyik lembe maeno. Kinde ma dwi adek ukadhu, jugam juriemo cen dhanu m’uworo ngo Yehova.

Oro apar ario ugam ukadhu. I kind oro maeno, judok jugiero gang’kidi mi Yerusalem kendo. Pieno, Ezra ugam ucoko dhu dhanu i lela ma dhanu becokiri lee i ie pi nisomo igi Cik pa Mungu. Kinde ma Ezra uyabu buku, dhanu ugam uai malu. Emio pak ni Yehova, e dhanu coyo cing’gi malu pi ninyutho nia gijolo. I ng’eye, Ezra usomo Cik man ekoro ie de, e dhanu giciko ithgi giwinjo cuu mandha. Giyiyo nia gidaru nikier kendo kud i kum Yehova, e giwak. Urwonde, Ezra usomo igi Cik mange. Gigam ginyang’ nia nindo ma gicikiri nitimo i ie Agba mi otbak udhingo. E ndhundhu nica gicaku yikiri pir agbane.

 Pi nindo abiro mir agba maeno, dhanu gibedo ku mutoro man gifoyo Yehova pi cam m’ucek igi lee i podho man ma gikayu. Nwang’u niai i rundi pa Yocuwa, Agba mi otbak m’utimere kumeca ubino mbe. I ng’ei agba maeno dhanu ugam ucokiri man girwo kumae: ‘Yehova, ibodhowa kud i ng’eca, imio iwa cam i langa man imio iwa ng’om maeni ma leng’. Ento asu asu, wawori ngo. Ibed ioro jubila de pi nitwong’owa, ento wawinjogi ngo. Re asu inyutho iwa cirocir. Igwoko lembang’ola peri m’itimo ni Abraham. Kawoni dong’ wabeng’olo nia wabiworo ndhu in.’ Gigam gigoro lembang’ola migine agora ku cing’gi, e judongomawijo ku Julawi man julam gigam giketho cing’gi i there.