Israelitanakajj Jerusalén markar kuttʼjjapjjäna uka tiempotjja 70 maranakaw pasjjäna. Ukampis yaqhepajj janïraw kuttʼapkänti, Persia markan apnaqat lugaranakanwa jakasipkäna. Maynejj Esdras satänwa. Jupajj Jehová Diosan Leyip yatichiri sacerdotënwa. Esdrasajja ‘Jerusalén markan janiw Diosan Leyipar istʼapkiti’ sasin parlir istʼäna ukhajja, yanaptʼir sarañwa munäna. Persia markan Artajerjes reyipajj akham sänwa: ‘Leyip yatichañamatakejj Diosaw yatiñ churtamjja. Ukhamajj Jerusalenar saram, khitinakatejj jumamp chik sarañ munapki ukanakamp sarapjjam’ sasa. Esdrasajj Jerusalenar kuttʼañ munapkäna ukanakaruw tantachthapïna. Ukatjja Jehová Diosaruw thakin jan kuna jan walis pasañapatakejj ruwtʼasipjjäna. Ukhamaw Jerusalenar kuttʼapjjäna.

Pusi phajjsitwa Jerusalenar puripjjäna. Jilïr jaqenakajj Esdrasar akham sapjjänwa: ‘Israelitanakajj janiw Jehová Diosar istʼapkiti, falso diosanakar adoririnakampiw casarasipjje’ sasa. ¿Esdrasajj kamachänsa? Taqe jaqenak nayraqatan qonqortʼasisaw akham sasin orasïna: ‘Jehová Dios, jumajj walja kutiw yanaptʼapjjestajja, ukampis nanakajj juma contraw juchachasipjjta’ sasa. Israelitanakajj arrepentisipkchïnsa, jan walinak lurasipkakïnwa. Ukatwa Esdrasajj jilïr irpirinakampi juezanakampi ajllïna, ukhamat kuna jan walinakas utji ukanak yatjjatapjjañapataki. Kimsa phajjsitjja khitinakatï Jehová Diosar adorañ jan munapkäna ukanakarojj alisnukjjapjjänwa.

12 maranakaw pasjjäna. Ukapachaw Jerusalén markan uyup perqañ tukuyjjapjjarakïna. Esdrasajj Diosan Leyip liytʼañatakejj plazaruw jaqenakar tantachthapïna. Diosan Leyipanïki uka libro jistʼaräna ukhajja, jaqenakajj taqeniw saytʼasipjjäna. Esdrasajj Jehová Diosaruw jachʼañchäna. Israelitanakasti jupampi acuerdöpjjatap uñachtʼayañatakejj amparanakapwa altor loqtapjjäna. Esdrasajj Diosan leyip liytʼasajj sum qhanañchäna. Jaqenakajj sum istʼapjjarakïna. Mayampi Jehová Diosat jitheqtapjjatap amuyasisajj jachapjjänwa. Qhepürojj Esdrasajj Diosan Leyip liytʼaskakïnwa. Ramanakamp Carpachasiñ Fiesta jakʼachasinitapwa amuyapjjarakïna. Ukatwa uka fiestatakejj wakichasiñ qalltapjjäna.

 Uka fiestajj apaskäna uka paqallqo urunakajja wal kusisipjjäna. Jehová Diosaruw suma cosecha apthapisajj wal yuspärapjjäna. Josué chachajj jiwjjäna uka qhepatjja janiw uka fiesta ukham amtapjjerïkänti. Fiestajj tukuyjjäna ukhajja, tantachasisaw akham sasin Diosar orasipjjäna: ‘Jehová Dios, jumaw esclavöñat salvanipjjesta. Jumaw wasaransa manqʼayapjjesta, aka suma oraqsa churapjjarakista. Ukampis nanakajj walja kutiw jan istʼapksmati. Ewjjañatakejj walja profetanaksa khitanipkchistajja, janiw casopksmati. Ukhampachas pacienciampiw uñjapjjestajja. Abrahanar promesa lurkayäta ukatsa janiw armasktati. Jichhat uksarojj istʼjjapjjapunïmawa’ sasa. Israelitanakajj uka promesapjja qellqtʼasipjjänwa. Ukatsti jilïr jaqenakampi, levitanakampi, sacerdotenakampiw firmapjjäna.