YIGIL 66
Esra a bi niiga Mbén Djob
Hala a yé bebee le 70 ma nwii le libim li bon ba Israel li bi témb i Yérusalem, ndi bape ba bé ki ntjamak ikété mambok ma nkoñ Persia. Wada wap le Esra, a bé prisi, a niigaga Mbén i Yéhôva. Ngéda Esra a bi nok le bôt ba Yérusalem ba bé noñ bé Mbén, a yoñ makidik i ke hôla bo. Kiñe Persia le Artaserses a kal nye le: ‘Djob a bi ti we pék kayéle u nla niiga Mbén yé. Kenek, u yoñ to numbe mut a gwé ngôñ i ke ni we.’ Esra a boma i bet ba bééna ngôñ i témb i Yérusalem. Ba soohe Yéhôva le a kônde tat bo inyu liké jap, ni bo ba telep, ba ke.
Ba bi bol i Yérusalem i mbus sôñ ina. Dikoo di mbok di loñ di kal Esra le: ‘Bon ba Israel ba ndogbene Yéhôva, ba mbiiba ni bingond bi bi mbégés bikwéha bi mop.’ Kii Esra a bi boñ? A telep bisu gwap, a ôm maboñ isi, a soohe le: ‘A Yéhôva, u mboñ ngandak mam inyu yés, ndi bés di ndogbene we.’ Bôt ba loñ ba bi tam béba yap, ndi ba bi waa bé boñ ngim mam i téé bé. Esra a tep mimañ ni bakéés inyu béñge mam ma. Mbus sôñ aa, ba buñge bet ba bé bégés bé Yéhôva.
Jôm li nwii ni ima mi bi tagbe. Ipôla i nyen ba bi tiimba oñ mapénd ma Yérusalem. Esra a kot bôt i mbamba, a éñél bo Mbén Djob. Kiki a nyibil kaat, bôt ba telep. A soohe Yéhôva, ni bo ba paa moo inyu unda le ba neebe. Ha nyen Esra a soñgol Mbén, a kobol yo, bôt ba emblege loñge loñge. Ba nôgda le ba bi témb ba ke haa ngandak ni Yéhôva, ba koho maéa. Hilo hi bé noñ, Esra a kônde éñél bo Mbén. Ba nok le ndék ngéda wee Ngand Bilap i nkola. Ba bôdôl kôôba.
Lôk Lévi ba sane yo.
Ngand i bi nom dilo disaambok, ba bi séé, ba ti Yéhôva mayéga inyu libumbul lilam. Ibôdôl dilo di Yôsua, Ngand Bilap ipe i ba bé kiki i. Mbus ngand, bôt ba bi kodba, ba soohe le: ‘A Yéhôva, wen u bi héa bés minkôm, u jés ki bés i ñoñ, u ti yak bés hini hisi hilam. Ndi to hala, di bi ke ndik ni bisu i ndogbene we. U bi ômle ki bés bapôdôl boñ, ndi di bi emble bé. To hala, u bi hônba bés. Malômbla u bééna lôñni Abraham, u bi tééda mo. Ndi ibôdôl nano, di mbôn we le d’a nôgôl we.’ Ba tila mbônga wap, dikoo di mbok, biprisi, ni bon ba“Ba ba nok bañga i Nyambe, ba téédaga ki yo, ba yé nsaibak.”—Lukas 11:28