Izraɛlifuɛ mun be sali be sin Zerizalɛmun w’a di afuɛ kɔe ableso (70). Sanngɛ be nun wie mun be te o Pɛrsi mɛn’n nun lɔ. Be nun kun yɛle Ɲanmiɛn ɲrun jranfuɛ Ɛsdrasi m’ɔ kle nvlefuɛ mun Ɲanmiɛn Mmla’n. Ɛsdrasi tili i kɛ be nga be o Zerizalɛmun lɔ’n be nantiman Ɲanmiɛn i Mmla’n su. I sɔ’n ti’n, ɔ kunndɛli kɛ ɔ́ kɔ́ lɔ naan ɔ́ kó úka be. Artaksɛrksɛsi m’ɔ ti Pɛrsi famiɛn’n seli i kɛ: ‘Ɲanmiɛn mannin wɔ ngwlɛlɛ naan a kle nvlefuɛ mun i Mmla’n. Sran ng’ɔ kunndɛ kɛ ɔ́ kɔ́ wie’n, fɛ i naan amun wɔ.’ Ɛsdrasi yiali be kwlaa nga be waan bé sá be sin Zerizalɛmun’n. Ka naan b’a wɔ’n, be srɛli Zoova kɛ ɔ sasa be naan be ju lɔ klanman.

Be dili anglo nnan atin nun naan b’a ju Zerizalɛmun. Kɛ be juli lɔ’n, kpɛnngbɛn mun be seli Ɛsdrasi kɛ: ‘Izraɛlifuɛ mun be nantiman Zoova i mmla’n su. Be jali bla nga be sɔ amuin’n.’ ?Ngue yɛ Ɛsdrasi yoli-ɔ? Nvlefuɛ mun be ɲrun lɛ’n, Ɛsdrasi kotoli, kpɛkun ɔ srɛli Ɲanmiɛn. Ɔ seli kɛ: ‘Zoova, a yoli like kpanngban mannin e, sanngɛ e yoli sa tɛ.’ Sa nga nvlefuɛ mun be yoli’n, ɔ yoli be nsisɔ. Sanngɛ ɔ fata kɛ be uka be naan be yo sa ng’ɔ ti kpa’n. Ɛsdrasi fali kpɛnngbɛn mun nin jɔlɛ difuɛ mun naan be siesie sa sɔ’n. Kɛ anglo nsan sinnin’n, be fuannin be nga be suman Zoova’n.

Afuɛ blu-nin-nɲɔn (12) w’a sin. Kɛ ɔ́ yó sɔ’n, nn b’a wie Zerizalɛmun klɔ’n i wun talɛ’n i kplan. Ɛsdrasi yiali nvlefuɛ mun naan ɔ́ kánngan Ɲanmiɛn Mmla’n nun ɔ́ klé be. Kɛ Ɛsdrasi tikeli fluwa’n su’n, sran mun be jasoli. Ɔ manmannin Zoova, yɛ sran mun be kusu be mannin be sa mun be su be fa kleli kɛ ndɛ ng’ɔ kannin’n ti be klun su. I sin’n, Ɛsdrasi kanngannin Mmla’n nun, kpɛkun ɔ yiyili nun. Nvlefuɛ mun be sieli be su kpa. Be wunnin kɛ be fɔnnin Zoova wun ekun. I sɔ’n ti’n be sunnin. Kɛ aliɛ cɛnnin’n, Ɛsdrasi kanngannin Mmla’n nun kleli be ekun. Be wunnin i wlɛ kɛ ɔ cɛ kan’n, ɔ fata kɛ be di kpata bo tranlɛ cɛn’n. Ɔ maan be boli be wun siesielɛ bo.

 Cɛn nso nga be fa dili cɛn’n be nun’n, be klun jɔli kpa. Be lali Zoova i ase. Afin ɔ yoli maan be fie mun be su ninnge mun be yoli kpa. Kɛ ɔ fɛ i Zozie blɛ su lele’n, be nin-a diman kpata bo tranlɛ cɛn kɛ ngalɛ’n sa le. Kɛ be wieli cɛn’n i di’n, be yiali, kpɛkun be srɛli Zoova. Be seli kɛ: ‘Zoova, i nun mɔ e ti kanga’n, a deli e. A niannin e lika aawlɛ flɛnnɛn’n nun lɔ, kpɛkun a fali mɛn klanman nga mannin e. Sanngɛ e fɔnnin ɔ wun kpɛ sunman. A sunmannin ɔ nuan ijɔfuɛ mun kɛ be tu e fɔ, sanngɛ y’a faman be ndɛ’n su. I kwlaa sɔ’n nun’n, a trali ɔ awlɛn. Like nga a seli Abraamun kɛ á yó’n, a yoli. Siɛn’n, é kán klé wɔ kɛ é yó ɔ klun sa’n titi.’ Like nga be waan bé yó’n, be klɛli i fluwa su, kpɛkun kpɛnngbɛn mun nin Levifuɛ mun nin Ɲanmiɛn ɲrun jranfuɛ mun be fali be sa ti nzɔliɛ sieli su.