Indokada swaf taun ri 70 rofyor snonkaku Israel sḇe si fa sibur ḇe Yerusalem raposa, sino sisya sḇarek kaker ro moḇ Karajan Persia. Oser ro si iso Imam Ezra, ḇeḇuk farkor Yahwe Sasoser Ḇyena. Rofyor Ezra ifawi snonkaku ḇero Yerusalem sya sisouser sasoser anna ḇa, imarisen ryaḇe diwa fa ifnoḇek si. Raja Artahsasta ro Persia ikofen ḇe i, ’Allah ifrur au fa wafawinanem insama ḇukfarkor Sasoser Ḇyena. Rwamura, ma wor mansei monda ḇemarisen ḇeso au sya.’ Ezra iryur kuker snonkaku ḇemarisen ḇekaḇer ḇe Yerusalem sya. Senadi faro Yahwe insama myamwarek si ro marandan sena, ramnai sramura.

Paik rifyak nawas mura, sifyafer ro Yerusalem. Manfarkin sya sikofenḇair ḇe Ezra, ’Snonkaku Israel sisouser faro Yahwe I ḇa ma sfarḇuk kuker bin ḇesyom allah ḇekaku ḇa sya.’ Rosai Ezra ifrur ya? Ḇyansuba ro ḇarpon snonkaku ansi, ma ḇyenadi, ’Yahwe yo, wafrur roi nabor kwar ḇe inko, ḇape nkofrur sasar yoḇ Au.’ Snonkaku sya simbror beri, ḇape sifandun kaker fafnoḇek infa sifrur roi ḇenapes ya. Ezra kyinfir manfarkin ma mankara ḇeḇeso sya fa smam samswen ine. Fafisu paik rikyor ramnai, snonkaku ḇemewer ḇesyom faro Yahwe I sya siyawbur si.

Taun risamfur seser risuru fyor sḇawes kaḇer ayar karui ro Yerusalem fa namnai mura, Ezra iwan snonkaku Israel sya fa siryur ro moḇ ḇeḇas. Imbe iwasya Allah Sasoser Ḇyena faro si. Fyor Ezra ḇyas syap sasoser ani, sores kam. Ezra isandik Yahwe ma sinankow sibrasna. Ine ḇyeḇair simarisen. Ramnai Ezra iwasya ma ikofenfasnai sasoser anna. Sikam srower pyum kaku. Sḇaḇir sisouser faro Yahwe I ḇa kwar, mura skanes. Meserdi, Ezra iwasya sasoser anna wer. Insape sifawi kerower fandun fa sifrur Munara Soyai Undam. Inja, sifasos beri fa sifrur munara ani.

 Snonkaku Israel sifrur munara ani ro ras rifik, siryaḇ ma sikofen kasumasa faro Yahwe snar sismai afuf nabor. Ro Yosua fafisu ḇyedi ḇebo, sifrur ḇaim Munara Soyai Undam ḇemnis radine. Munara ya imnai mura, siryur ma senadi, ’Yahwe yo, buk ḇaḇemkei ḇe inko kwar ro ḇaḇewomen, buk ḇe inko anan ro fafisu nkoro moḇ ḇeḇeursḇa, ma buk ḇe inko sup ḇepduk kaku. Ḇape, nkosouser ḇe Au ḇa ker. Wawan nabi ḇansi fa sḇuk swarapepen ḇe inko, mboi nkorower na ḇa. Rarirya, ḇekaḇaḇaḇ pdef. Waswarepen kaker asas bena faro Abraham ma wafrur na. Kirine nkoḇeasas nari nkosouser faro Au.’ Sfasepen asas sifrur nane, mura manfarkin, snonkaku Lewi, ma imam sya sikapkopḇair na.