Amin gia melala kalak Israel si nggo mulih ku Jerusalem 70 tahun si lewat, tapi deba nari tading denga i Kerajan Persia. Salah sadana eme imam Esra, si ngajarken Perentah Jahwe. Iperdiateken Esra maka kalak Jerusalem la patuh man perentah e, emaka isampatina atena kalak e. Nina Artasasta raja Persia man Esra, ‘Nggo iban Jahwe kam beluh ngajarken perentah Jahwe, emaka to, lawes kam ku Jerusalem, baba ise atendu si jadi temanndu.’ Dung e, pulung me Esra ras kalak si nggit mulih ku Jerusalem. Ertoto kalak e gelah ilindungi Jahwe ia bas perdalanen, nce berangkat me kalak e.

Empat bulan kenca si e, seh me kalak e bas Jerusalem. Nina pejabat-pejabat si lit i je man Esra, ‘Nggo gawat kalak Israel enda, la ia patuh man Jahwe, erjabu ia man kalak si nembah dewa-dewa.’ Megi si e, kai si ilakoken Esra? Ertoto ia ilebe-lebe kalak e, ‘O, Jahwe, bujur kel Kam man kami, tapi lalap kami erdosa man baNdu.’ Dungna, ertobat kalak e, tapi lit denga si man pekenan. Ipilih Esra me pertua-pertua ras hakim-hakim guna mpekenasa. Bas telu bulan saja, kalak si la nembah Jahwe ipelawes arah kuta e nari.

La gejap, nggo sepuluh dua tahun waktu erdalan, janah tembok Jerusalem terus ibangun. Ipepulung Esra me kerina kalak Israel i bas lapangen, nce ibacakenna Undang-Undang Dibata. Ibukana kitab e ilebe-lebe kalak si nggo cinder i je. Ikatakenna bujur man Jahwe, janah kerina kalak si lit i je iangkatna duana tanna tanda setuju. Kenca si e, ijelasken Esra Undang-Undang e, janah kerina kalak megiken ia alu tutus. Ngandung me kalak e perban ietehna maka nggo ndauh ia arah Jahwe nari. Pepagina, ibacaken Esra ka Undang-Undang si deban. Arah kai si ibegi kalak e, ietehna maka arus irayakenna Wari Raya Sapo-Sapo. Emaka mis kalak e ersikap guna ngerayaken wari e.

 Perayan e pitu wari dekahna. Meriah kel ukur kalak e, janah ipujina Jahwe perban sinuan-sinuanna mbue hasilna. Lenga pernah lit perayan si bage riahna mulai jaman Josua nari. I bas pendungi perayan e, pulung ia kerina guna ertoto nina, ‘O Jahwe, ibebaskenNdu kami arah perbudaken nari, ibereNdu kami man sanga i padang gurun, ibereNdu kami taneh si mejile. Tapi, rusur kel kami la patuh man baNdu, isuruhNdu nabi-nabi mpersingeti kami tapi la ibegiken kami. Amin pe bage, lalap Kam sabar man kami. ItepatiNdu janjiNdu man Abraham. Emaka gundari erjanji kami guna patuh man baNdu.’ Itulisken kalak e me janjina, janah kerina pejabat, kalak Lewi, ras imam-imam namaken meterai i surat e.