I ti’n fer apepre 70 an depi ki laplipar Izraelit ti’n retourn Zerizalenm, me serten ti ankor pe reste dan diferan rezyon Lanpir Pers. Enn parmi zot ti en pret ki apel Ezra. Ezra ti ansenny Lalwa Zeova. Ezra ti tande ki bann dimoun Zerizalenm pa ti pe swiv Lalwa e i ti anvi al ed zot. Lerwa Pers, Artakzerses ti dir li: ‘Bondye in fer ou malen pour ki ou kapab ansenny son Lalwa. Ale e anmenn avek ou nenport ki ki anvi al avek ou.’ Ezra ti zwenn avek tou bann ki ti anvi retourn Zerizalenm. Zot ti priy Zeova e demann li pour protez zot pandan zot vwayaz. Apre zot ti konmans zot vwayaz.

Kat mwan pli tar, zot ti ariv Zerizalenm. Bann prens laba ti dir Ezra: ‘Bann Izraelit in dezobei Zeova e marye avek bann madanm ki ador bann fo bondye.’ Ki Ezra ti fer? Devan tou dimoun, Ezra ti tonm azenou e konmans priye: ‘Zeova, ou’n fer en kantite keksoz pour nou me nou’n fer pese kont ou.’ Bann dimoun ti repantir me zot ti bezwen led pour aret fer bann move keksoz. Ezra ti swazir bann ansyen ek ziz pour okip sa bann zafer. Pandan trwa mwan, bann ki pa ti ador Zeova ti ganny pouse.

Douz an ti pase. Antretan, miray otour Zerizalenm ti ganny rekonstrir. Alor Ezra ti rasanble lepep dan en landrwa piblik pour lir Lalwa Bondye. Ler Ezra ti ouver liv, bann dimoun ti debout. I ti loue Zeova e bann dimoun ti lev zot lanmen anler pour montre ki zot dakor. Apre Ezra ti lir e eksplik Lalwa, bann dimoun ti ekout byen. Zot ti aksepte ki zot ti’n abandonn Zeova e zot ti plere. Son lannmen, Ezra ti lir Lalwa avek zot ankor. Zot ti aprann ki byento, zot ti pou bezwen selebre Lafet bann Payot. Deswit zot ti konmans prepare pour sa lafet.

 Pandan sa set zour lafet, bann dimoun ti zwaye e zot ti remersi Zeova pour en bon rekolt. I pa ti’n zanmen annan en Lafet Payot koumsa depi lepok Zozye. Apre sa lafet, bann dimoun ti rasanble e priye: ‘Zeova, ou ti sov nou dan lesklavaz, donn nou manze dan dezer e donn nou sa zoli pei. Me plizyer fwa, nou’n dezobei ou. Ou ti anvoy bann profet pour averti nou, me nou pa ti ekoute. Kantmenm sa, ou ti demontre pasyans anver nou. Ou ti gard ou promes avek Abraam. La nou promet ki nou pou obei ou.’ Zot ti ekri zot promes e bann prens, Levit ek pret ti dakor avek sa.