A saan 70 lo ye Israɛldenw fanba kɔsegira Zeruzalɛmu, nka u dɔw jɛnsɛnnin bele tora Pɛrɛsiw ka mara yɔrɔ caaman na. U la dɔ ye sarakalasebaga dɔ ye min tɔgɔ ko Ɛsidirasi. A tun be mɔgɔw kalan Jehova ka sariya la. Ɛsidirasi y’a mɛn ko Zeruzalɛmu mɔgɔw tɛ Ala ka sariya labatora ani a b’a fɛ ka taga u dɛmɛ. Pɛrɛsi masacɛ Aritasɛrisɛsi y’a fɔ a ye ko: ‘Ala ye hakili di i ma walisa i ka mɔgɔw kalan a ka sariya la. Mɔgɔ o mɔgɔ b’a fɛ ka tugu i kɔ, u minɛ aw be taga.’ Minw bɛɛ tun b’a fɛ ka kɔsegi Zeruzalɛmu, Ɛsidirasi y’u bɛɛ lajɛn. U ye Jehova deli a k’u latanga u ka tagamajan na. O kɔ, u ye sira minɛ.

Kalo naani tɛmɛnin kɔ, u sera Zeruzalɛmu. Kuntigiw y’a fɔ Ɛsidirasi ye ko: ‘Israɛldenw ma mɛnni kɛ Jehova fɛ: u ye musow furu minw be ngalon alaw bato.’ Ɛsidirasi ye mun kɛ do? A y’a kunbiri gwan duguma jama ɲɛɛ na ka Ala deli ko: ‘Jehova, i ye koo caaman kɛ an ye, nka an y’i hakɛ ta.’ Jama nimisara, nka u bele tun be koo tilenbaliw kɛra. Ɛsidirasi ye cɛkɔrɔbaw ni kititigɛlaw bɔ k’o koo ɲɛnabɔ. Kalo saba minw tugura o kɔ, minw tun tɛ Jehova bato, u ye olu gwɛn.

Saan tan ni fila tɛmɛna. O wagati kɔnɔ, Zeruzalɛmu laminikogow lɔra. Ɛsidirasi ye jama lajɛn forobayɔrɔ la ka Ala ka sariya kalan u ye. A ye kitabu dayɛlɛ tuma min na, jama wulila ka lɔ. A ye Jehova tando, ani jama y’u bolow kɔrɔta k’a yira ko a bɛnna u ma. O kɔ, Ɛsidirasi ye sariya kalan k’a kɔrɔ fɔ. Jama y’a tulo malɔ ka mɛnni kɛ kosɔbɛ. U sɔnna ko u y’u yɔrɔ janya Jehova la tugun ani u kasira. O dugusagwɛ, Ɛsidirasi ye sariya yɔrɔ wɛrɛ kalan u ye. U y’a faamu ko yanni dɔɔni, u ka ɲi ka Gwatakɔrɔsigi seli kɛ. U sinna k’o seli labɛnw daminɛ.

O tile wolonfila seli kuru bɛɛ kɔnɔ, jama ye ɲɛnagwɛ kɛ ani u ye Jehova fo sabu a y’a kɛ u ka  sumanw ɲɛna. O Gwatakɔrɔsigi seli ɲɔgɔn tun ma deli ka kɛ kabi Zozuwe tile la. O seli kɔ, jama ye ɲɔgɔn lajɛn ka Ala deli ko: ‘Jehova, i y’an kisi ka bɔ jɔnya la, k’an balo kongokolon kɔnɔ ani ka jamana ɲuman nin di an ma. Nka an tora ka ban ka mɛnni kɛ i fɛ. I ye kiraw ci ka na an lasɔmi, nka an ma mɛnni kɛ. I bele muɲuna an kɔrɔ. I tun ye layidu min ta Ibrayima ye, i y’o dafa. Sisan, an b’an daa di ko an bena mɛnni kɛ i fɛ.’ U y’u ka layidu kumaw sɛbɛ ani kuntigiw, Levitew ni sarakalasebagaw y’u bolonɔw bila a kan.