Sa oti toka e 70 na yabaki nodra lesu i Jerusalemi na Isireli. Ia eso era tiko ga ena veivanua e Perisia. Dua vei ira o Esera na bete, e dau vakavulica na lawa i Jiova. E qai kila o Esera nira sega ni muria tiko na Lawa na lewe i Jerusalemi, e via vukei ira sara ga. E kaya vua o Atakisekise na Tui Perisia: ‘E vakavukui iko na Kalou mo vakavulica nona Lawa. Lako, kauti ira era vinakata mera tomani iko.’ Era sota kece kei Esera o ira na via lesu i Jerusalemi, era masu vei Jiova me taqomaka nodra ilakolako balavu, oti era biubiu sara.

Era yaco yani ni oti e va na vula. Era kaya sara vei Esera na turaga e Jerusalemi: ‘Era sa talaidredre vei Jiova na Isireli, era vakawati kei ira na yalewa qaravi kalou lasu.’ Na cava e cakava o Esera? E tekiduru e matadra na Isireli qai masu: ‘Kemuni Jiova, dua na ka nomuni vukei keimami, ia keimami sa valavala ca vei kemuni.’ Era mani veivutuni, ia eso era cakava tiko ga na ka ca. E qai digi ira na qase kei na turaganilewa o Esera mera dikeva na tikina qori. Ena loma ni tolu na vula, era vakatalai o ira na sega ni via qaravi Jiova.

Oti e 12 na yabaki, ni se tara tiko na bai kei Jerusalemi, e soqoni ira vata na Isireli o Esera ena rara me wilika vei ira na Lawa ni Kalou. Ni dolava na ivola, era tucake sara. E vakacaucautaki Jiova o Esera, era laveta tale ga na ligadra mera vakaraitaka nira duavata kina. E wilika qai vakamacalataka na Lawa o Esera nira vakarorogo na Isireli. Era vakatusa nodra sa biuti Jiova ra qai veitagicaki. Ena siga tarava, e wilika tale vei ira o Esera na Lawa, era qai kila ni dodonu mera soqova na Soqo ni Valetabanikau. Era mani vakavakarau kina.

Ena loma ni vitu na siga ni nodra soqo, era marau ra qai vakavinavinakataki Jiova ni vuavuaivinaka na  nodra were. A vakayacori na Soqo ni Valetabanikau va qori ni se bula o Josua. Oti era soqoni vata na Isireli mera masu: ‘Kemuni Jiova, oni sereki keimami mai na veivakabobulataki, oni vakani keimami ena vanua dravuisiga, oni qai solia vei keimami na vanua totoka qo. Ia levu na gauna keimami talaidredre vei kemuni. Oni talai ira nomuni parofita mera vakasalataki keimami, ia keimami sega ni vakarorogo. Oni vosoti keimami tiko ga. E dei tu ga nomuni veiyalayalati kei Eparama. Keimami yalataka qo me keimami talairawarawa vei kemuni.’ Era vola na Isireli na ka era yalataka ra qai dregata na turaga, na Livai kei ira na bete.