Eetaairü maʼaka 70 juya alataka süchikijee nantüin nachikuaʼa na israeliitakana Jerusalénmüin; eejana waneinnua israeliita kepiakana suluʼu tü mma naluwataakalü aaʼu na persakana. Naʼaka naya israeliitakana, eejachi wanee wayuu kanüliakai Esdras. Nia wanee sacerdoote ekirajaka Nünüiki Jeʼwaa. Nütüjaapa saaʼu moonooin na chajanakana Jerusalén sümaa Nünüiki Maleiwa, oʼuneejaasü naaʼin süpüla nükaaliinjain naya. Müshi Artajerjes chi aluwataaikai saaʼu Persia: «Kekiishi maʼin pia nutuma Maleiwa süpüla pikirajüin tü Nünüikikat. Puʼuna otta pümaa na oʼuneekana pümaa». Nuutkajaaka Esdras namaa na oʼuneekana Jerusalénmüin. Nachuntaka nümüin Jeʼwaa süpüla naaʼinmajüin naya wopuluʼu jee noʼunaka.

Sülatapa pienchi kashi, antüshii naya Jerusalénmüin. Anuu nanüiki na laülaashii chajanakana Jerusalén nümüin Esdras: «Moonooinsalii na israeliitakana sümaa nünüiki Jeʼwaa otta kaʼwayuuseshii naya jieyuu aʼwaajaka maleiwayaasü». ¿Kasakaʼa naaʼinrüin Esdras? Nüsapainkaka nia suʼupala tü wayuukalüirua sünain maa: «Jeʼwaakalee, wainma maʼin tü kasa anasü paaʼinrakat wapüleerua, ayatapejeʼe waya kaainjalain puʼupala». Mayaainjeʼe mojuin naaʼin saaliijee naainjala, ayatüshii naya aainjain kasa mojusü. Nüneekaka Esdras wanee laülaashii süpüla nachajaainjatüin sukuwaʼipa süpüla natüjaain saaʼu jamüin maka nakuwaʼipa. Soʼu apünüin kashi, najünajaain napüshuaʼa na ayoutakana aʼwaajaa Jeʼwaa.

Sülatapa poloo piamamüin juya, kettaasü süsepü Jerusalén. Nuutkajeʼeraka Esdras tü wayuukalüirua pülaasapaʼa süpüla naashajeʼerüin namüin tü Nünüikikat Maleiwa. Nujutatpa Esdras tü Karaloʼuta nünüikimaajatkat Maleiwa, ashaʼwalaashii na wayuukana. Nuʼwaajünaka Jeʼwaa nutuma Esdras otta nayaleraka najapü na israeliitakana iipünaamüin süpüla neeʼiyatüin anain tia namüin. Mapa, naashajeʼerüin Esdras tü Nünüikikat Maleiwa sümaa nüküjain jamaluʼuluin shia. Jülüjasü maʼin naaʼin tü pütchikat. Nayaawata aaʼulu nakatalaain nuulia Jeʼwaa otta aʼyalajüshii naya saaliijee tia. Waneemüin kaʼi, naashajeʼerüin Esdras süchikuaʼa tü Nünüikikat Maleiwa. Nayaawataka saaʼu na israeliitakana sünain naaʼinrüinjatüin tü miʼiraakat eere kalumaseyaain naya. Nachajaamaatüin sukuwaʼipa süpüla naaʼinrüin tia miʼiraakat.

Talatüshii maʼin na israeliitakana soʼu tü akaratshikat kaʼi naaʼinraka oʼu tü miʼiraakat. Naapüin analuʼut nümüin Jeʼwaa  saaʼujee anain sukuwaʼipa naʼttia. Wainma kaʼi alataka sümaa nnojoluin naaʼinrüin tü miʼiraakat eere kalumaseyaain naya, akatüjülia kataiwaʼaya noʼu Josué. Sajaʼttapa tia miʼiraakat, outkajaashii naya otta oʼuraajüshii naya sünain müin nanüiki: «Jeʼwaakalee, pia piakai taashika atuma waya suulia achepchiee. Paapüinka wamüin eküülü chaa isashiipaʼa otta paapüin wamüin wanee mma anaka maʼin. Ayatapejeʼe eʼrüliin waya wayumüin sümüin pünüiki wainmatua. Nnojoishii jaa müin waya pümüin mayaainjeʼe puluwataain wainma pünüikimaajana süpüla nachiaain waya. Mayaainjeʼe müin wakuwaʼipa, nnojoishi pia aashichijaain wamüin. Nnojotsü motuin paaʼin tü püküjakalü achiki paala nümüin Abraham. Aluʼusaʼa jooluʼu waapüin wanüiki pümüin sünain woonooinjanain waneepia pümaa». Nashajiraka na israeliitakana tü pütchi napansaajakat nümüin Jeʼwaa suluʼu karaloʼuta otta müshia na laülaashiikana, na leviitakana namaa na sacerdootekana naseyaajüin tia.