Nai pa kapita ozombura ape 70 Ovaisrael ovengi tji va za nokuyaruka koJerusalem, posiya tjiva ngunda aave kara motupa pekepeke twOuhona waPersie. Umwe wawo wari omupristeri wena Esra ngwaa hongo ovandu Omatwako waJehova. Esra wa zuva kutja ovandu moJerusalem kaave ṱakamisa Omatwako, neye aa vanga okuyenda ngo me kevevatere. Ombara Kerkes yaPersie ya tja ku ye: ‘Mukuru we ku tjita kutja u rire onongo kokutja u honge Omatwako we. Twende, nu twaerera auhe ngu ma vanga okuyenda puna ove.’ Esra wa kahakaena ku novandu avehe mbaave vanga okuyaruka koJerusalem. Owo va kumba ku Jehova kutja me ve tjevere mouyenda wawo oure, tjazumbo ookuyenda.

Omieze 4 kombunda yanao, owo va vaza moJerusalem. Ovanane ngo va karaera Esra nave tja: ‘Ovaisrael kavena pu va puratena ku Jehova nu va kupa ovakazendu mbe rikotamena koomukuru voposyo.’ Esra wa tjita vi? Komurungu wovandu avehe, Esra wa wora ozongoro na kumbu a tja: ‘Jehova, we tu tjitira oviṋa ovingi, posiya eṱe twa tura ondjo komurungu woye.’ Ovandu ve ritanaura, posiya owo ngunda aave tjiti oviṋa mbi heri ovisemba. Esra wa toorora ovanene novapangure kutja ve tare koviṋa mbi. Momieze 3 mbya kongorera ko, imba mbe hina aave rikotamene ku Jehova va hindwa kwarwe.

Pa kapita ozombura 12. Nu moruveze ndwo otumbo twaJerusalem twa tungururwa. Okutja Esra wa woronganisira otjiwaṋa poruveze rwomaworonganeno kutja me ve lesere Omatwako waMukuru. Indu Esra tja paturura Embo rOmatwako, otjiwaṋa tja sekama. Eye wa tanga Jehova nu otjiwaṋa tja yera omake watjo meyuru okuraisa kutja otjo wina matji itavere. Okuzambo Esra wa lesa na kahurura Omatwako, nu otjiwaṋa aatji puratene nawa. Owo va itavera kutja va poka ku Jehova rukwao nu va rira. Eyuva nda kongorera ko, Esra we ve lesera Omatwako rukwao. Owo ve rihonga kutja mave sokuuta okuzemburuka Eyuva enene rOviranda vyOmaso tjimanga. Nu tjimanga owo va uta okurirongerisira eyuva enene ndi.

 Oure womayuva 7 ngaave zemburuka eyuva ndi, owo va ri nondjoroka nave tja okuhepa ku Jehova komakondero omawa wovikunwa. Okuza koruveze Josua tja ri ko owo kave yarora okukara nEyuva enene rOviranda vyOmaso. Kombunda yeyuva enene ndi, otjiwaṋa tja worongana pamwe natji kumbu atji tja: ‘Muhona, ove we tu yama koukarere, we tu parura mokuti onguza notupe ehi ewa ndi. Posiya povikando novikando eṱe katwa ri nonḓuviro kove. Ove wa hinda ovaprofete voye kutja ve tu rakize, posiya eṱe katuna pu twa puratena. Nu ngunda wa ri nomuretima na eṱe. Omakwizikiro ngwa tjita ku Abraham wa yenenisa. Nai matu kwizike kutja matu kara nonḓuviro kove.’ Owo va tjanga omakwizikiro wawo nga nu ovanane, Ovalevi novapristeri va twa ko otjihako tjawo ku wo.