Israela masha law malawng gaw Yerusalem mare de, bai n htang wa ai shaning 70 na sai raitim, nkau mi gaw Persi Hkawseng Mungdan a shara nkau mi hta naw nga nga ai. Shanhte kaw nna marai langai gaw, Yehowa a tara ni hpe sharin ya ai hkinjawng Ezra re. Yerusalem mare masha ni gaw, Karai a Tara ni hpe n hkan sa ai lam Ezra chye mat ai shaloi, dai de sa nna shanhte hpe karum ya mayu wa ai. Persi Hkawhkam Artahkere gaw shi hpe ndai hku tsun ai: ‘Karai Kasang gaw nang hpe hpaji byeng ya jaw ai majaw, shi a Tara ni hpe nang lu sharin ya na re. Sa su. Nang hte hkan nang mayu ai kadai rai timung shaga sa mat u.’ Ezra gaw Yerusalem mare de bai wa mayu ai ni hte hkrum zup ai. Shanhte gaw hkrun lam galu hkawm ai shaloi, shanhte hpe makawp maga ya na matu, Yehowa kaw akyu hpyi ai. Dai hpang, bu hkawm na matu pru wa ma ai.

Shata 4 na ai hpang, shanhte gaw Yerusalem mare de du wa ma ai. Du agyi salang ni gaw Ezra hpe ndai hku tsun ai: ‘Israela ni gaw Yehowa a ga n madat nna, shut shai ai hpara nawku ai num ni hte hkungran la ma ai.’ Ezra hpa galaw na kun? Masha ni a man hta, Ezra gaw hput di di nna, ndai hku akyu hpyi ai: ‘Yehowa e, nang gaw anhte a matu grai galaw ya wa sai. Raitim, anhte gaw na ntsa yubak chyu sha galaw nga ai.’ Masha ni gaw myit malai lu ma ai. Raitim, jaw ai hpe shanhte galaw na matu karum shingtau lam naw ra taw nga ai. Ezra gaw agyi salang ni hte tara agyi ni hpe lata nna, dai lam hpe sawk sagawn ai. Shata masum lai ai hpang, Yehowa hpe n nawku ai masha ni hpe shapraw kau ai.

Shaning 12 na mat sai. Dai shaning ni laman, Yerusalem mare bunghku hpe bai gawgap ma ai. Ezra gaw mare masha ni hpe shawa htingwang de shaga dat nna, Karai a Tara ni hpe hti dan ai. Dai Tara laika hpe Ezra hpaw ai shaloi, masha ni rawt tsap ma ai. Yehowa hpe Ezra shakawn ai shaloi, masha ni mung lata sharawt let myit hkrum ai lam madun ma ai. Tara laika hpe Ezra hti nna, sanglang ya ai hpe masha ni gaw atsawm sha madat la ma ai. Yehowa hpe mara bai galaw hkrup sai ngu shanhte a mara hpe yin la nna, hkrap ma ai. Hpang shani hta, Ezra gaw kaga tara ni hpe bai hti dan ai. Kade n na yang, Sum Poi galaw na aten du wa sana lam hte dai poi galaw ra na lam shanhte chye mat ai. Dai majaw, shanhte gaw poi galaw na matu kalang ta hkyen lajang ma ai.

 Poi galaw ai 7 ya laman, masha ni gaw grai ngwi pyaw ma ai. Nai mam mung grai byin ai majaw, Yehowa hpe chyeju shakawn ma ai. Yawshu a lakhtak hta, dai zawn Sum Poi hpe hpang jahtum galaw wa ai re. Sum poi galaw ngut ai hpang shani hta, masha ni gaw arau zup hpawng nna, ndai hku akyu hpyi ai: ‘Yehowa e, nang gaw anhte hpe mayam prat kaw nna hkye la wa ai. Nam mali hta mung anhte hpe lusha jaw sha nna, tsawm la ai ndai mungdan hpe mung jaw ai. Raitim, anhte ni gaw kahtap htap mara galaw nna, na a ga hpe n madat ma ai. Myihtoi ni hpe nang shangun dat nna, sadi jaw timung, anhte n madat ya ma ai. Dai pyi, nang gaw anhte a ntsa myit naw galu ya nga ai. Nang gaw Abraham hpe jaw wa ai ga sadi hpe mung dung ai. Anhte ni na a ga hpe madat na matu, ya ga sadi jaw ga ai law.’ Dai ga sadi hpe ka da nna, du agyi salang ni, Lewi masha ni hte hkinjawng ni gaw ga sadi laika ntsa dazik dawk ma ai.