Myaka vakuvĩ 70 yaĩ mĩthelu kuma Aisilaeli ala aingĩ masyoka Yelusaleme, ĩndĩ kwaĩ o Aisilaeli amwe mekalaa isionĩ ingĩ syĩ kĩvathũkanyʼo ila syasumbĩkĩtwe nĩ Ũsumbĩ wa Velisia. Ũmwe woo aĩ mũthembi weetawa Esala, na nĩwamanyĩasya andũ Mĩao ya Yeova. Esala nĩwamanyie kana andũ ala maĩ Yelusaleme mayaatĩĩaa Mĩao, na nĩwendaa kũthi akamatetheesye. Nĩvo ĩndĩ mũsumbĩ wa Velisia ũla weetawa Alitasasita wamwĩie atĩĩ: ‘Ngai nũtumĩte wĩthĩwa wĩ mũĩ nĩ kana ũmanyĩsye Mĩao yake. Enda, na ũiendanyʼa na mũndũ o na wĩva ũla ũkwenda kũthi naku.’ Kwoou Esala nĩwoombanie na andũ onthe ala mendaa kũsyoka Yelusaleme. Matanambĩĩa kyalo nĩmamũvoyie Yeova nĩ kana amasũvĩe me kyalonĩ kĩu kĩasa mũno.

Ĩtina wa myei ĩna, andũ asu nĩmavikie Yelusaleme. Yĩla mavikie, anene ala maĩ kũu matavisye Esala atĩĩ: ‘Aisilaeli nĩmaekie kũmwĩwʼa Yeova na nĩmatwaĩte aka mathaithaa ngai sya ũvũngũ.’ Esala eewʼa ũu eekie ata? Atulilye ndu mbee wa andũ, na amũvoya Yeova akyasya: ‘Ame Yeova, ũtwĩkĩte maũndũ maingĩ mũno maseo, ĩndĩ ithyĩ nĩtũkũvĩtĩsye.’ Andũ nĩmeelilile, ĩndĩ nĩmendaa kũtetheewʼa nĩ kana meke ũla waĩle. Kwoou Esala nĩwanyuvie atumĩa na asili nĩ kana mamatetheesye. Ĩtina wa myei ĩtatũ, ala matamũthaithaa Yeova nĩmalũngilwʼe.

Myaka 12 nĩyavĩtũkie kuma Esala na andũ ala waĩ namo masyoka Yelusaleme. Na ĩvindanĩ yĩu, ngũta ila syathyũlũlũkĩte Yelusaleme nĩsyaakiwe ĩngĩ. Kwoou Esala nĩwoombanisye andũ vandũ ũtheinĩ nĩ kana amasomee Mĩao ya Ngai. Yĩla Esala wavingũie ĩvuku ya Mĩao, andũ nĩmaũngamie. Esala nĩwamũtaĩie Yeova, na andũ onthe mookĩlya moko nĩ kana monanyʼe kana nĩmeetĩkĩlana nake. Na ĩndĩ asoma ĩla Mĩao na amĩelesya, na andũ nĩmeethukĩĩsye nesa. Andũ asu nĩmeetĩkĩlile kana nĩmamũtiĩte Yeova ĩngĩ, na kwoou maĩa. Mũthenya ũla waatĩĩe, Esala nĩwamasomeie maũndũ angĩ kuma ĩla Mĩaonĩ. Nĩmamanyie kana o mĩtũkĩ nĩmaaĩlĩte kwĩthĩwa na Mboka ya Malwanda kana ya Ivanda. Vate kwananga ĩvinda, nĩmambĩĩie kwĩyũmbanĩsya mboka ĩsu.

 Mĩthenyanĩ ĩsu mũonza maĩ na mboka, andũ nĩmatanie na mamũtũngĩa Yeova mũvea nũndũ wa ngetha nzeo. Kuma mĩthenyanĩ ya Yosua vayaĩ vaaĩthĩwa Mboka ya Malwanda ta ĩsu. Ĩtina wa mboka, andũ nĩmoombanie vamwe na mavoya mayasya atĩĩ: ‘Yeova, nĩwatũvonokisye kuma ũkombonĩ, watũĩthya twĩ weũnĩ, na watũnenga nthĩ ya kwendeesya. Ĩndĩ nĩtwakũvĩtĩisye ĩngĩ na ĩngĩ. Nĩwatũmie athani matũkanyʼe, ĩndĩ tũyaamethukĩĩsya. O na ũu wĩ o vo, nĩwaendeeie kũmĩĩsya. O na nĩwaendeeie kwĩanĩsya maũndũ ala wamwathĩte Avalaamu. Ĩndĩ yu nĩtũũkwatha kana tũkakwĩthukĩĩasya.’ Mamina kwĩka ũu, nĩmaandĩkie maũndũ ala mamwathie Yeova, na ĩndĩ anene ma Ayuti, Alivai, na athembi moonanyʼa kana nĩmeetĩkĩla ũndũ ũsu.