Ak xnumeʼk tana 70 chihabʼ chalen naq li xkʼihalil ebʼ laj Israel xeʼsutqʼiik Jerusalen, usta wiibʼ oxibʼ toj wankebʼ saʼ xteepal li tenamit Persa. Jun rehebʼ laj Israel aʼin aʼan laj Esdras, jun laj tij li naxkʼut li Xchaqʼrabʼ li Jehobʼa. Laj Esdras kixnaw naq ebʼ li poyanam re Jerusalen inkʼaʼ yookebʼ xpaabʼankil li Chaqʼrabʼ, joʼkan naq kiraj xik aran re xtenqʼankilebʼ. Laj Artajerjes, li awabʼej re Persia, kixye re: «Li Yos kixkʼe aanaʼlebʼ re naq taakʼut li Xchaqʼrabʼ. Joʼkan naq, ayu ut kʼam li ani traj xik chaawix». Laj Esdras kixchʼutubʼ ribʼ rikʼinebʼ li nekeʼraj sutqʼiik Jerusalen. Keʼxtzʼaama chiru li Jehobʼa naq tixkʼaakʼalehebʼ saʼ bʼe, tojaʼ naq xkohebʼ.

Ak xnumeʼk kaahibʼ po naq keʼwulak Jerusalen. Ebʼ li winq li wankebʼ xwankil saʼ li tenamit xeʼxye re laj Esdras: «Ebʼ laj Israel inkʼaʼ xeʼabʼink chiru li Jehobʼa ut xeʼsumlaak rikʼinebʼ li ixq li nekeʼxloqʼoni bʼalaqʼil yos». Kʼaru kixbʼaanu laj Esdras? Kixwiqʼibʼ ribʼ chiru chixjunil li tenamit ut kitijok: «At Jehobʼa, laaʼat nakaabʼaanu naabʼal li chaabʼil naʼlebʼ choʼq qe, abʼan laaʼo xoomaakobʼk chaawu». Li tenamit kixyotʼ xchʼool, abʼan inkʼaʼ kixkanabʼ xbʼaanunkil li inkʼaʼ us. Joʼkan naq laj Esdras kixxaqabʼebʼ cheekel winq ut ebʼ aj raqol aatin re naq teʼxtzʼil rix li yook chi kʼulmank. Chiru oxibʼ po, xeʼrisi chixjunilebʼ li inkʼaʼ xeʼraj xloqʼoninkil li Jehobʼa.

Xnumeʼk 12 chihabʼ. Tojaʼ naq, keʼraqeʼk xyiibʼankil wiʼ chik li xtzʼakil li tenamit Jerusalen. Laj Esdras kixchʼutubʼ ebʼ li poyanam saʼ xyi li tenamit re xyaabʼasinkil rehebʼ li Xchaqʼrabʼ li Yos. Naq kixte xhuhil li Chaqʼrabʼ, li tenamit kixaqliik. Laj Esdras kixkʼe xloqʼal li Jehobʼa, ut ebʼ laj Israel xeʼxtaqsi li ruqʼ re xkʼutbʼal naq xeʼwulak chiru li yookebʼ rabʼinkil. Chirix chik aʼan, laj Esdras kixyaabʼasi ut kixchʼolobʼ li Chaqʼrabʼ. Li tenamit kixkʼe xchʼool chi rabʼinkil. Xeʼxye naq xeʼnajtoʼk chiru li Jehobʼa wiʼ chik ut xeʼok chi yaabʼak. Wulajaq chik, laj Esdras kiʼok xyaabʼasinkil rehebʼ li Chaqʼrabʼ. Ebʼ laj  Israel xeʼxkʼe reetal naq tento teʼxnima li Ninqʼe re xmolkʼankil ru li awimq. Ut saʼ junpaat xeʼok xkʼubʼankil ribʼ choʼq re li ninqʼe.

Chiru li wuqubʼ kutan li xwank wiʼ li ninqʼe, ebʼ laj Israel sahebʼ chaq saʼ xchʼool. Xeʼxbʼanyoxi re li Jehobʼa li xchaabʼilal ru ebʼ li rawimq. Moko xwank ta junaq Ninqʼe re xmolkʼankil ru li awimq joʼ aʼin chalen naq yoʼyo chaq laj Josue. Naq xraqeʼk li ninqʼe, xeʼxchʼutubʼ ribʼ ut xeʼtijok: «At Jehobʼa, laaʼat xooʼaawisi chi moosil. Xooʼaachʼolani saʼ li chaqichʼochʼ ut xaakʼe qe li chʼinaʼusil chʼochʼ aʼin. Abʼan laaʼo ak naabʼal sut xqaqʼet qibʼ chaawu. Usta xaataqla naabʼal laapropeet re qaqʼusbʼal, inkʼaʼ xooʼabʼink. Abʼan, xwank aakuyum saʼ qabʼeen. Maajunwa xsachk saʼ laachʼool li xaayeechiʼi re laj Abrahan. Anaqwan, relik chi yaal naqaye aawe naq tooʼabʼinq chaawu». Li tenamit kixtzʼiibʼa li xyeechiʼom, ut ebʼ li xninqal ru winq, ebʼ laj Levi ut ebʼ laj tij xeʼjuchʼuk rikʼin jun li bʼon.