Kwarĩ kĩndũ mĩaka 70 kuuma rĩrĩa Aisiraeli aingĩ maacokire Jerusalemu, o na gũtuĩka amwe no maaikaraga kũndũ gũtiganĩte kũrĩa guothe Perisia yathanaga. Ũmwe wao aarĩ Ezara, na aarĩ mũthĩnjĩri-Ngai warutanaga Watho wa Jehova. Ezara nĩ aamenyire atĩ andũ arĩa maarĩ Jerusalemu matiarũmagĩrĩra Watho ũcio, na nĩ eendaga gũthiĩ kuo nĩguo amateithie. Mũthamaki Aritashashita wa Perisia nĩ aamwĩrire ũũ: ‘Ngai aakũheire ũũgĩ nĩguo ũrutane Watho wake. Thiĩ na mũndũ o wothe ũkwenda gũthiĩ hamwe nawe.’ Ezara nĩ aacemanirie na andũ arĩa othe meendaga gũcoka Jerusalemu. Nĩ maahoire Jehova amagitĩre marĩ rũgendo-inĩ rũu rwarĩ rũraihu, na magĩcoka makĩambĩrĩria gũthiĩ.

Maakinyire Jerusalemu thutha wa mĩeri ĩna. Anene a kũu meerire Ezara ũũ: ‘Aisiraeli nĩ maagĩte gwathĩkĩra Jehova tondũ mahikĩtie atumia mahoyaga ngai cia mĩhianano.’ Ezara eekire atĩa? Aaturirie maru mbere ya andũ na akĩhoya ũũ: ‘Jehova, nĩ ũtwĩkĩire maũndũ maingĩ mũno ĩndĩ ithuĩ nĩ tũkwĩhĩirie.’ Andũ nĩ meeririre, no no meekaga maũndũ mataarĩ mega. Ezara nĩ aathuurire athuri na atuanĩri cira nĩguo marore ũndũ ũcio. Kwa ihinda rĩa mĩeri ĩtatũ ĩrĩa yarũmĩrĩire, andũ arĩa mataahoyaga Jehova nĩ maaingatirũo.

Ihinda rĩa mĩaka ikũmi na ĩĩrĩ nĩ rĩahĩtũkire na thingo igĩkorũo irĩkĩtie gwakwo rĩngĩ. Nĩ ũndũ ũcio, Ezara agĩcokanĩrĩria andũ nja ya hekarũ nĩguo amathomere Watho wa Ngai. Rĩrĩa aahingũrire ibuku rĩa Watho, andũ no kũrũgama maarũgamire. Aagoocire Jehova, nao andũ makĩoya moko na igũrũ ĩrĩ njĩra ya gwĩtĩkania nake. Ezara aacokire agĩthoma Watho na agĩtaarĩria ũrĩa woigĩte, nao andũ makĩmũthikĩrĩria na kinyi. Nĩ meetĩkĩrire atĩ nĩ maatiganĩirie Jehova rĩngĩ na makĩrĩra mũno. Mũthenya ũrĩa warũmĩrĩire, Ezara nĩ aamathomeire maũndũ mangĩ maingĩ marĩa maarĩ thĩinĩ wa Watho. Nĩ maamenyire atĩ  ihinda rĩtarĩ kũraihu nĩ maagĩrĩirũo gũkũngũĩra Gĩathĩ gĩa Ithũnũ. Maambĩrĩirie kũhaarĩria gĩathĩ kĩu o hĩndĩ ĩyo.

Thikũ ciothe mũgwanja cia gĩathĩ kĩu, andũ nĩ maakenire mũno na magĩcokeria Jehova ngatho nĩ ũndũ wa indo iria maagethete. Gũtiakoretwo na gĩathĩ kĩngĩ gĩa ithũnũ ta kĩu kuuma hĩndĩ ya Joshua. Thutha wa gĩathĩ kĩu andũ nĩ maacokanĩrĩire makĩhoya ũũ: ‘Jehova, nĩ watũrutire ũkombo-inĩ, ũgĩtũhe irio tũrĩ werũ-inĩ, na ũgĩcoka ũgĩtũhe bũrũri ũyũ mũthaka. No nĩ twaikaraga tũgĩkũhĩtagĩria. Nĩ watũtũmagĩra anabii nĩguo matũkaanie, no tũtiamathikagĩrĩria. O na kũrĩ ũguo, nĩ watũkirĩrĩirie. Nĩ watũũririe kĩrĩkanĩro kĩrĩa mwarĩkanĩire na Iburahimu. Rĩu nĩ twehĩta atĩ nĩ tũrĩgwathĩkagĩra.’ Nĩ maandĩkire mwĩhĩtwa ũcio, nao anene, Alawii, na athĩnjĩri-Ngai makĩwĩkĩra rũũri rwao.