Opa li pa pita eedula 70 okudja eshi Ovaisrael vahapu va li va shuna kuJerusalem, ashike vamwe vomuvo ova li natango hava kala moitukulwa i lili noku lili mouhamba waPersia. Umwe womuvo okwa li omupristeri wedina Esra, oo a li ha hongo oshiwana Omhango yaJehova. Esra okwa li a uda kutya ovanhu muJerusalem kava li tava dulika kOmhango, nokwa li a hala okuya ko e ke va kwafele. Ohamba yaPersia, Artasasta, oya li ya lombwela Esra ya ti: ‘Kalunga okwe ku pa ounongo opo u shiive okuhonga Omhango yaye. Inda hano, ove u ye nakeshe oo a hala okuya pamwe naave.’ Esra okwa li a kundafana novanhu aveshe ovo va li va hala okushuna kuJerusalem. Ova li va ilikana kuJehova e va amene mondjila oyo ile, ndele tava i.

Konima yeemwedi nhee, ova li va fika muJerusalem. Ovakulunhu ovo va li tava kwatele komesho muJerusalem ova li va lombwela Esra tava ti: ‘Ovaisrael ihava dulika kuJehova nova hombola ovakainhu ovo hava longele oikalunga.’ Mbela Esra okwa li a ninga po shike? Esra okwa twa eengolo moipafi yovanhu, ndele ta ilikana ta ti: ‘Jehova, owe tu ningila oinima ihapu neenghono, ndele fye otwa nyona kwoove.’ Ovanhu ove livela ombedi, ndele natango ova li tava twikile okulonga osho inashi yuka. Opo nee Esra okwa hoolola ovakulunhu novatokoli opo va kundafane kombinga yoinima oyo. Momukokomoko weemwedi nhatu da landula ko, ovo va li itava longele Jehova ova li va tewaatewa.

Momukokomoko weedula 12 okudja opo, ekuma olo la dingilila Jerusalem ola kala tali tungululwa. Opo nee, Esra okwa li a ongela ovanhu ponhele yaaveshe opo e va leshele Omhango yaKalunga. Eshi Esra a pandja embo, ovanhu ova li va kala ofika. Okwa li a hambelela Jehova, novanhu ova li va yelula omake avo tava ulike kutya ova twa kumwe naye. Opo nee Esra okwa lesha Omhango ndele te i fatulula, novanhu ova li va pwilikina nelitulemo. Ova li va dimina kutya ova li natango va nyona kuJehova, nova lila. Efiku la landula ko, Esra okwa li e va leshela natango Omhango. Ova li ve lihonga kutya ove na okudana diva Oshivilo shOmatwali. Diva, ova li va hovela okulilongekidila oshivilo.

 Oule womafiku aheyali oshivilo, ovanhu ova li va hafa nova pandula Jehova omolweteyo liwa. Oshivilo shOmatwali sha fa osho oshe lixula okudanwa pefimbo laJosua. Konima yoshivilo, ovanhu ova li va ongala ndele tava ilikana tava ti: ‘Jehova, owe tu xupifa moupika, we tu palula mombuwa nowe tu pa edu e li liwa. Ndele otwa kala ihatu dulika kwoove lwoikando noikando. Owe tu tumina ovaprofeti ve tu londwele, ndele inatu pwilikina. Ndele nande ongaho, owe tu tala onheni. Owa diinina eudaneko loye olo wa li wa udanekela Abraham. Paife ohatu udaneke kutya ohatu ka dulika kwoove.’ Ova li va shanga eudaneko lavo, ndele omalenga, Ovalevi novapristeri tave li denge oshihako.