Ndoo chua niŋ suɛi wɔsila 70 chɔŋ a teleŋ Isɔluɛiya miiŋgu Chulusalɛm ndo. Kɛ apum wa wɔ o lɛŋii cheleŋnde niŋ o Masale Paasiaŋnda bɛŋgu. Wana pilɛ o nda tɛɛŋ wa wana soliaa lasalaa Ɛsilua ni. Ndu ndoo pɛɛku waŋnda sawala Chɛhowa laŋ ni. Mi Ɛsilua sina maa waŋnda Chulusalɛm cho Sawala Mɛlɛkalaŋ tolɔɔ kɔɔli le. Le hei, mbo yeema le nda kɔlaŋ malaa. Mi Masa Paasiaŋnda Atasasɛɛ dimul ndu aa: ‘Mɛlɛka ke num taasioo ni le halikpeŋ ma wa waŋnda Sawala ndɔlaŋ pɛɛkoo. Wana o wana yeema pɛ mi la kuɛ nya ndu, dimul ndu mi la kuɛ.’ Mi Ɛsilua bii bɔŋaŋndo a wanaa ndaa yeema miiŋgoo Chulusalɛm nda kpou. Ma piɛi o Chɛhowa lo le mbo manda nda o tiŋ vilɛi koŋ niŋ. Okoŋ, ma bii nɛiyo le kɔlaŋ.

Paŋgoŋ hiɔɔlu okoŋ kɔɔli, ma fuuluu Chulusalɛm. Mi wanaa fula o yuŋgu lemasaa choo wa dimul Ɛsilua aa: ‘Isɔluɛiya kɛɛ Chɛhowa diomndo tueiyɔɔ, ma chua waŋ laanduaa cho mɛlɛkaa lachoowaa piɛiyo wa o nɔlaŋ niŋ.’ Yɛɛnɛ Ɛsilua ndoo tosa yɛ? Mi Ɛsilua baŋ wulaŋ waŋnda kpou o hɔl. Okoŋ mbo piɛi aa: ‘Chɛhowa, a tosa niŋ sɔɔŋ tau le naa, kɛ ŋ tosa hakioo a num.’ Mi waŋnda mulul yɔŋnda ndala wɔɔŋndaŋ kɔɔ. Kɛ a koŋ kpou, a wa wɔ sɔɔŋ bɛnda le woŋ tosaa. Mi Ɛsilua hɛli bɛnduaa a wanaa kialaa ŋyamaa le sɔɔŋ muŋ yaasiaa. Paŋgoŋ yaa okoŋ kɔɔli, ma tuau wanaa ve Chɛhowa piɛi le wa kpou.

Mi wɔsilaŋ la hiau tɔ a la tiɔɔŋ. A boondii keŋ, ma miŋgi kpakioo Chulusalɛm taŋgul. Okoŋ, mi Ɛsilua chuuŋgiaa waŋnda kpou o luŋ, mbo veelul nda diomndaŋ o yau Mɛlɛkaa niŋ. Mɛɛ Ɛsilua kumbi yau simbulaa, mi waŋnda kpou sim. Ma saŋgala Chɛhowa, nduyɛ mi nda kpou heelu balaŋ choo choo diompilɛ. Mi Ɛsilua veelul nda diomndaŋ, mbo tɛɛsial nda Sawalaŋ, nduyɛ waŋnda kpou wa nilaŋ yaŋɔɔ yekeŋ. Ma chɛl maa a faŋaŋ vɛlɛ o nɛi Chɛhowaa choo. Le hei, ma chaŋ chaŋndo pila. Diimandɔɔ, mi Ɛsilua veelul nda vɛlɛ diomndaŋ o yau Mɛlɛkaa niŋ. Ma sina maa o teleŋ biŋgi bɛŋgu, a nɔ ma bii Bɔŋaŋ Labafɛiyo. O lepilɛ niŋ kpe, ma kandu bɛɛndiaŋndo le bɔŋaŋndo hoo biyɔɔ.

Le palɛi ŋɔmmɛu waŋnda wa o bɔŋaŋndo hoo choo ve, ma duaunuŋ nyaale, nduyɛ ma mel Chɛhowa balika le  mɛɛ o tosa mi tɔlɔɔla ndalaŋ la naŋ yɛ. Chɔŋ a teleŋ Chɔɔsuaa wo, lepilɛ bɛɛ waŋnda ndaa biiyɔ Bɔŋaŋ Labafɛiyo maa koŋ te. Mɛɛ bɔŋaŋndo hoo chuu, mi waŋnda chuuŋgiaŋ naapilɛ ma piɛi aa: ‘Chɛhowa, num soli naa o chɛleŋ niŋ ni, ma ke naa nyɛdiaa o yondo pollo niŋ, nduyɛ ma ke naa lɛŋnde kɛndɛ kɛndɛleŋ. Kɛ teleŋnda bɔɔbɔɔ, ŋ wa num kiɔɔ diomndo tueiyɔɔ. Ma yɔŋ wanaa ndaa suaa le num nda le naa silaa, miŋ kɛɛ le nda diomndo tueiyɔɔ. Kɛ a koŋ kpou, ma biunuŋ naa. Ma lo o buŋgɛi ŋ chuel Ebilaham nde choo. Lelaŋ, ŋ chua buŋgɛi maa ŋ cho num diomndo tueiyɔɔ.’ Ma poonyiaa buŋgɛi nda chua hei ve, mi wanaa fula o yuŋgu lemasaa choo wa, Livaiya, a wanaa soliaa lasalaa pila suei.