တၢ်မၤလိ ၆၆
စီၤဧ့စြၤ သိၣ်လိဝဲယွၤ အတၢ်သိၣ်တၢ်သီ
ပှၤအံၣ်စရ့လးဖိအါတက့ၢ် က့ၤကဒါက့ၤဆူ ဝ့ၢ်ယရူၤၡလ့ၣ်အပူၤ အိၣ်လံအနံၣ် ၇၀ ဃၣ်ဃၣ်လံ. ဘၣ်ဆၣ် ပှၤအံၣ်စရ့လးဖိတနီၤန့ၣ် အိၣ်တ့ၢ်ဒံးဝဲလၢ ဖၢၡၢၣ်အဘီမုၢ်အတၢ်ပၢဖီလာ်လီၤ. ပှၤလၢအိၣ်တ့ၢ် ဖဲန့ၣ်တဖၣ်အကျါ ပၣ်ဃုာ်ဒီးပှၤလုၢ်တၢ်အဒိၣ်စီၤဧ့စြၤလၢ အသိၣ်လိယဟိဝၤယွၤအတၢ်သိၣ်တၢ်သီလီၤ. စီၤဧ့စြၤနၢ်ဟူဘၣ်ဝဲလၢ ပှၤအိၣ်လၢဝ့ၢ်ယရူၤၡလ့ၣ်အပူၤန့ၣ် အဝဲသ့ၣ်တလူၤပိာ်ထွဲဝဲ ကစၢ်ယွၤ အတၢ်သိၣ်တၢ်သီဘၣ်. လၢတၢ်န့ၣ်အဃိ စီၤဧ့စြၤအဲၣ်ဒိးက့ၤမၤစၢၤအဝဲသ့ၣ်လီၤ. ဖၢၡၢၣ်အစီၤပၤအၢ်တၤၡါၡတၤ တဲဘၣ်အီၤလၢ– ‘ကစၢ်ယွၤဟ့ၣ်လီၤနၤတၢ်ကူၣ်သ့လၢ နကသိၣ်လိယွၤ အတၢ်သိၣ်တၢ်သီလီၤ. ယဟ့ၣ်နၤအခွဲးလၢနကက့ၤလီၤ. ဒီးပှၤလၢအအဲၣ်ဒိးက့ၤဒီးနၤန့ၣ် နက့ၤကိးအဝဲသ့ၣ်သ့လီၤ.’ စီၤဧ့စြၤထံၣ်လိာ်သးဒီး ကယဲၢ်ပှၤလၢအအဲၣ်ဒိးက့ၤလၢ ဝ့ၢ်ယရူၤၡလ့ၣ်လီၤ. အဝဲသ့ၣ်ဃ့ဘါထုကဖၣ်တၢ်ဆူ ယဟိဝၤယွၤအအိၣ် ဒ်သိးကဒီသဒၢအဝဲသ့ၣ် လၢတၢ်လဲၤတၢ်က့ၤအံၤအဂီၢ်လီၤ. ဝံၤဒီးအဝဲသ့ၣ်က့ၤဝဲလီၤ.
လွံၢ်လါဝံၤအလီၢ်ခံ အဝဲသ့ၣ်က့ၤတုၤဝဲလၢ ဝ့ၢ်ယရူၤၡလ့ၣ်အပူၤလီၤ. ပဒိၣ်ဖဲန့ၣ်တဖၣ် တဲဘၣ်စီၤဧ့စြၤလၢ– ‘ပှၤအံၣ်စရ့လးဖိတဖၣ် တဒိကနၣ်ယဟိဝၤယွၤအကလုၢ်ဘၣ်. အဝဲသ့ၣ်ဟံးန့ၢ်အမါ လၢပိာ်မုၣ်လၢအဘူၣ်ထီၣ်ဘါထီၣ်ယွၤလၢ အကမၣ်တဖၣ်အကျါလီၤ.’ အဃိ စီၤဧ့စြၤကမၤဝဲဒ်လဲၣ်. စီၤဧ့စြၤချံးလီၤအခီၣ်လၢ ကမျၢၢ်အမဲာ်ညါ ဒီးဃ့ဘါထုကဖၣ်ဝဲလၢ– ‘ယဟိဝၤယွၤဧၢ, နမၤစၢၤတ့ၢ်ပှၤအါမး. ဘၣ်ဆၣ် မ့မ့ၢ်ပဝဲတခီ ပမၤကမၣ်ဘၣ်နၤလံ.’ ပှၤဂီၢ်မုၢ်တဖၣ်ပီၢ်ယၢ်လီၤက့ၤအသး ဘၣ်ဆၣ် အဝဲသ့ၣ်မၤဒံးဝဲတၢ်လၢအကမၣ်န့ၣ်လီၤ. လၢတၢ်န့ၣ်အဃိ စီၤဧ့စြၤဃုထၢထီၣ် ပှၤသူၣ်က့သးပှၢ် ဒီးစံၣ်ညီၣ်ကွီၢ်တဖၣ်လၢ ကဃုသ့ၣ်ညါ တၢ်ဂ့ၢ်တဖၣ်အံၤလီၤ. ပူၤကွံာ်သၢလါအတီၢ်ပူၤ ပှၤလၢအတဘူၣ်ထီၣ်ဘါထီၣ် ယဟိဝၤယွၤန့ၣ် ဘၣ်တၢ်နီဟးထီၣ်ကွံာ်အဝဲသ့ၣ်လီၤ.
တၢ်ဆၢကတီၢ်လဲၤပူၤကွံာ် တဆံခံနံၣ်လံ. ဒီးဖဲတဆံခံနံၣ်အံၤအတီၢ်ပူၤန့ၣ် ပှၤဘှီဂ့ၤထီၣ်က့ၤဝဲ ဝ့ၢ်ယရူၤၡလ့ၣ်အဒူၣ်လီၤ. စီၤဧ့စြၤကိးဖှိၣ်ဝဲပှၤဂီၢ်မုၢ်တဖၣ် ဒီးအဝဲဖးထီၣ်ဝဲယွၤအတၢ်သိၣ်တၢ်သီလၢ အဝဲသ့ၣ်အမဲာ်ညါလီၤ. ဖဲစီၤဧ့စြၤအိးထီၣ်ဝဲ လံာ်တၢ်သိၣ်တၢ်သီအခါ ပှၤဂီၢ်မုၢ်တဖၣ်ဂဲၤဆၢထၢၣ်ဝဲလီၤ. စီၤဧ့စြၤစံးထီၣ်ပတြၢၤ ယဟိဝၤယွၤ ဒီးပှၤဂီၢ်မုၢ်တဖၣ်ယူာ်ထီၣ်အစု ဒီးတူၢ်လိာ်ဝဲလီၤ. ဝံၤဒီး စီၤဧ့စြၤဖးထီၣ်ဝဲလံာ်တၢ်သိၣ်တၢ်သီ ဒီးဖဲတဲဖျါထီၣ်ဝဲအခီပညီအခါ ပှၤဂီၢ်မုၢ်ဒိကနၣ်ဝဲလီၤတံၢ်လီၤဆဲးလီၤ. လၢတၢ်န့ၣ်အဃိ အဝဲသ့ၣ်သ့ၣ်ညါလီၤက့ၤအသးလၢ အမၤကမၣ်ဘၣ်ယဟိဝၤယွၤဒီး ဟီၣ်ဝဲယၢၤဝဲလီၤ. လၢခံတနံၤန့ၣ် စီၤဧ့စြၤဖးဒီးတဲနၢ်ပၢၢ်အါထီၣ်ဝဲ လံာ်တၢ်သိၣ်တၢ်သီလီၤ. ဒီးပှၤဂီၤမုၢ်တဖၣ်သ့ၣ်ညါဝဲလၢ တယံာ်တမီၢ်န့ၣ် အဝဲသ့ၣ်ကဘၣ်မၤဝဲဘူၣ်ဒဲလီၤ. အဃိ တဘျီဃီန့ၣ်အဝဲသ့ၣ်စးထီၣ် ကတဲာ်ကတီၤတၢ်လၢ မူးပွဲအဂီၢ်လီၤ.
လၢမူးပွဲနွံသီအတီၢ်ပူၤန့ၣ် ပှၤဂီၢ်မုၢ်တဖၣ်ပှဲၤဒီး တၢ်သူၣ်ဖှံသးညီ ဒီးစံးဘျုးစံးဖှိၣ်ဝဲယဟိဝၤယွၤ ခီဖျိလၢအဝဲသ့ၣ် တၢ်သူၣ်တၢ်ဖျးမဲထီၣ်ဂ့ၤဂ့ၤအဃိလီၤ. စးထီၣ်လၢစီၤယိၤၡူအစိၤ တုၤလီၤလၢခဲအံၤန့ၣ် ပှၤယူဒၤဖိတဖၣ်တမၤဝဲ ဘူၣ်ဒဲဒ်အံၤနီတဘျီဘၣ်. ဖဲမၤဝဲဘူၣ်ဒဲအံၤဝံၤအလီၢ်ခံ ပှၤဂီၢ်မုၢ်တဖၣ်ပာ်ဖှိၣ်ထီၣ်အသး ဒီးဃ့ဘါထုကဖၣ်ဝဲလၢ– ‘ယဟိဝၤယွၤဧၢ, နမၤပူၤဖျဲးပှၤလၢကုၢ်အလီၢ်, လုၢ်အီၣ်လုၢ်အီပှၤလၢပှၢ်မုၢ်ကနၢ ဒီးဟ့ၣ်လီၤပှၤလၢထံကီၢ်လၢ အဃံအလၤအံၤလီၤ. ဘၣ်ဆၣ် တဘျီဝံၤတဘျီန့ၣ် ပတဒိကနၣ်နကလုၢ်ဘၣ်. နဆှၢလီၤနဝံတဖၣ်လၢ ကဟဲဟ့ၣ်ပလီၢ်ပှၤ ဘၣ်ဆၣ် ပတဒိကနၣ်အဝဲသ့ၣ်အကလုၢ်ဘၣ်. နဆဲးပာ်ဖျါထီၣ်ဒံး တၢ်ဝံသးစူၤလၢပဖီခိၣ်လီၤ. နတီဒီးနတၢ်အၢၣ်လီၤလၢ နအၢၣ်လီၤဒီးစီၤအၤဘြၤဟၣ်လီၤ. ခဲအံၤ ပအၢၣ်လီၤနၤလၢ ပကဒိကနၣ်နကလုၢ်လီၤ.’ အဝဲသ့ၣ်ကွဲးလီၤအတၢ်အၢၣ်လီၤဝံၤဒီး ပဒိၣ်ပပှၢ်, ပှၤလ့ၤဝံဖိဒီးပှၤလုၢ်တၢ်အဒိၣ်တဖၣ်န့ၣ် စဲပနီၣ်ဃာ်ဝဲတၢ်အၢၣ်လီၤအီလီၤအံၤလီၤ.
“မ့ၢ်မးပှၤလၢအနၢ်ဟူ ယွၤအကလုၢ်အကထါ, ဒီးတိၢ်န့ၢ်ဝဲတဖၣ်န့ၣ်, ဘၣ်ဆိၣ်ဂ့ၤဝဲလီၤ.”—လူၤကၣ် ၁၁:၂၈
တၢ်ဂ့ၤအဂၤလၢ နကဘၣ်သး
တၢ်ဂီၤမူလၢ လံာ်စီဆှံ အကတြူၢ်အဂီၢ်
တၢ်ကတိၤအိးထီၣ်လၢ လံာ်ဧ့စြၤအဂီၢ်
ယဟိဝၤယွၤ တီဒီးအတၢ်အၢၣ်လီၤ လၢကမၤထူၣ်ဖျဲး အပှၤဂီၢ်မုၢ်လၢ ဝ့ၢ်ဘၤဘူၤလိၣ် ဒီးကသူၣ်ထီၣ်က့ၤ တၢ်ဘူၣ်တၢ်ဘါ အမ့ၢ်အတီလၢ ဝ့ၢ်ယရူၤၡလ့ၣ်န့ၣ်လီၤ.
