Kutunda apa Vaisraeli va tengwire koJerusarema, kwa pitire po nomvhura 70, nye vamwe simpe kwa tungire monomukunda edi ngava pangere Vaperesiya. Gumwe gwawo, kwa kere mupristeli Esira, ogu nga rongo Veta zaJehova. Esira ga dimbwilire asi vantu womoJerusarema kapi ngava kwama Veta, yipo ga here kuza a ka va vatere. Mupangeli gwaPeresiya Aretaserekesesi ta tantere Esira asi: ‘Karunga yige ga ku pa nondunge o ronge Veta zendi. Zende, ntani pitura nkenye ogu ana hara kuza nove.’ Esira ta ligwana nanavenye ava va here kuza koJerusarema. Tava kanderere kwaJehova a va pitisire morugendo rwawo, makura tava ka za.

Konyima zomakwedi gane, yipo va ka sikire koJerusarema. Ano vagendesi tava tantere Esira asi: ‘Vaisraeli kapi vana kulimburukwa Jehova ntani awo kuna kukwara vakadi wovanayirongo.’ Yisinke ga rugene ko Esira? Komeho zombunga, Esira ta tu nongoro nokukanderera asi: ‘Jehova, yinzi wa tu ruganena, nye ose twa zona koge.’ Vantu va litezwilire, nye simpe ngava rugana yininke yoyidona. Esira ta horowora vagendesi novapanguli va pakere mbili yuma oyo. Konyima zomakwedi gatatu, vakadi owo kwa va tengwidire ko kwawo.

Ta pa piti nomvhura 12. Ngomu sa pitire siruwo, makuma gaJerusarema kwa ga tungwilire. Esira makura ta pongeke vantu a va resere Veta zaKarunga. Apa Esira ga penwine buke, vantu tava sikama. Age ta pandura Jehova, makura mbunga tazi yi kwatesa ko pokuzerura mawoko. Esira ta resa Veta nokuzifaturura, vantu tava purakene. Awo va yi tambwire asi va zumba Jehova, makura tava lili. Ezuva lyokukwama ko, Esira ta va resere hena Veta. Awo va dimbwilire asi va hepere kurugana Sipito soYikorogo. Poopo ngoso, tava tameke kuliwapaikira sipito oso.

Momazuva gatano-nagavali gosipito, vantu kwa  hefe nokupandura Jehova. Oru yiro romuhowo kurugana Sipito soYikorogo kutunda komazuva gaJosuwa. Konyima zosipito, vantu kwa pongere, nokukanderera asi: ‘Jehova, ove kwa tu zowora moupika, nokutupa nondya momburundu ntani nosirongo sosiwa. Nye nkenye siruwo, ose kapi ngatu kulimburukwa. Ngo tumu vaporofete va tu pukurure, nye kapi twa purakenene. Nye, ove ngo lididimikire. Wa sikisa mo etumbwidiro lyoge kwaAbirahamu. Ngesi tuna tumbwidire asi nga tu kulimburukwa.’ Awo kwa tjenge etumbwidiro lyawo, makura vagendesi noVarevhi ntani novapristeli tava yi kwatesa ko.