Tezo kia 70 lwa mvu lwavioka tuka Aneyisaele ayingi bavutukila kuna Yerusaleme. Kansi, akaka bakwamanana zingila mu fulu yaswaswana ya Kintinu kia Aparasi. Mosi muna yau i Ezera wa nganga, ona walonganga Nsiku a Yave. Ezera wawá e nsangu vo wantu muna Yerusaleme ke balemvokelanga Nsiku ko ye wazola kwenda kubasadisa. O Antakesate wa Ntinu a Parasi, wamvovesa vo: ‘Nzambi uvene ngangu kimana walonga Nsiku andi. Wenda yo twasa konso ona ozolele kwiza yaku.’ Ezera wakutakesa awonso ana bazola vutuka kuna Yerusaleme. Basamba kwa Yave kimana kabatanina muna nzila, i bosi bayatika o nkangalu.

Ngonde yá badiata muna lwaka kuna Yerusaleme. Akuluntu bavovesa Ezera vo: ‘Aneyisaele bakolamene Yave, basompele akento ana besambilanga nzambi zaluvunu.’ Adieyi Ezera kavanga? Vana ntadisi a nkangu, Ezera wafukama yo samba vo: ‘E Yave, mayingi ovanganga mu kuma kieto, kansi tusumukini.’ O nkangu waviluka o ntima, kansi bakwamanana vanga mambu mambi. Ezera wasola akuluntu ye afundisi mu tala e mambu mama. Mu kolo kia ngonde tatu, awana ke basambilanga Yave ko basindikwanga.

Mvu kumi ye zole miavioka. Muna kolo kiaki, e yaka ya Yerusaleme yatungululwa. Muna kuma kiaki, Ezera wakutakesa nkangu vana yanzala kianene mu kubatangila Nsiku a Nzambi. Vava Ezera kaziula o nkanda, o nkangu watelema. Ezera wakembelela Yave, o nkangu wazangula moko. I bosi, Ezera watanga yo sasila o Nsiku, o nkangu wawá ye sungididi kiawonso. Batambulwila vo bavengomoka Yave, bayantika dila. Muna lumbu kialanda, Ezera wabatangila diaka Nsiku. Balongoka vo ke kolo ko, bafwete kembelela o Nkinzi a Nzo za Sudi. Vana vau, bayantika vanga nkubika.

 Muna lumbu kiansambwadi kia nkinzi, o nkangu wayangalala yo vutula matondo kwa Yave mu kuma kia mbongo ayingi babaka. Tuka muna lumbu ya Yosua, ke vasidi kala Nkinzi a Nzo za Sudi nze wau ko. Kuna mfoko a nkinzi, o nkangu wakutakana yo samba vo: ‘E Yave, ngeye watuvuluza muna ubundu, watudikila muna makanga yo kutuvana e nsi yayi yambote-mbote. Kansi, twakolamanga ntangwa zawonso. Watwika ngunza mu kutulukisa, kansi ke twabawila ko. Wakwamanana songa luzindalalu. Walungisa o nsilu una wasia kwa Abarayama. Owau, tusidi o nsilu vo tukulemvokela.’ Basoneka o nsilu wau, akuluntu, Anelevi ye nganga basia wo e dimbu.