Higni ma dirom 70 koro nosekalo nyaka ne Jo-Israel dog Jerusalem. Kata kamano, moko kuomgi pod ne odak kuonde mopogore opogore e alwora ma Persia ne lochoe. Achiel kuom jogo ne en Ezra ma ne puonjoga ji Chike Jehova. Ezra nofwenyo ni joma ne ni Jerusalem ne ok luw Chike Jehova, kendo nodwaro dhi konyogi. Artashasta ruodh Persia nonyise kama: ‘Nyasaye omiyi rieko mondo ipuonj ji Chikene. Dhiyo, kendo ng’ato ang’ata ma dwaro dhi kodi bende nyalo dhi.’ Ezra ne oromo gi ji duto ma ne dwaro dok Jerusalem. Ne gilemo ka gikwayo Jehova mondo oritgi maber e yo ka gidok pacho, kae to ne gichako wuoth.

Bang’ dweche ang’wen, ne gichopo Jerusalem. Jodongo ne onyiso Ezra kama: ‘Jo-Israel ok luw chike Jehova, kendo gisekendo mon ma lamo nyiseche manono.’ Ezra ne otimo ang’o ka ne owinjo wachno? Nogoyo chonge piny e nyim ji duto, molemo kama: ‘Jehova, isekonyowa e yore mathoth ahinya, to wan wasetimo richo e nyimi.’ Ji noloko chunygi, kata kamano, pod ne nitie gik ma ne gitimo ma ok beyo. Omiyo, Ezra ne oyiero jodongo gi jong’ad bura mondo onon wechego. E dweche adek ma noluwo, ne oriemb ji duto ma ne ok lam Jehova.

Higni 12 nokalo. E kindeno bende e ma ne olosie kuonde ma ne okethore e ohinga mag Jerusalem. Ezra nochoko ji mondo osomnegi Chike Nyasaye. Ka ne Ezra oelo buk ma noting’o chikego, ji duto ne ochung’. Ezra ne opako Jehova, kendo ji ne oting’o badgi malo ka ginyiso ni ne giyie gi wechego. Kae to Ezra ne osomo ne ji Chike Jehova, kendo lero tiendgi, kendo ji ne ochiko itgi adimba. Ne giyie ni ne ok giluw Chike Jehova e yo maber, kendo ne giywak malit nikech mano. Kinyne, Ezra ne omedo somonegi Chike Jehova. Ne gifwenyo ni ne onego gitim Sawo mar Kiche. Gikanyono, ne gichako ikore ne sawono.

Kuom ndalo abiriyo ma notimgo sawono, ji ne obedo mamor ahinya, kendo ne gidwoko ne Jehova erokamano  kuom miyo cham ochieknegi maber. Onge Sawo mar Kiche ma ne osetim ma chal gi mano chakre kinde Joshua. Bang’ sawono, ji ne ochokore ma gilemo ka giwacho kama: ‘Jehova, niresowa ka ne wan e tuech, ne imiyowa chiemo ka ne wan e thim, kendo ne imiyowa piny ma jaberni. To e ma wasebedo ka wachwanyi sa te sa te. Ne ioro jonabi mondo omiwa siem, to ne ok wawinjogi. To pod ne ihori ahoya kodwa. Ne itimo gik ma ne isingo ne Ibrahim. Koro, dwaher singoni ni wabiro luwo Chikeni.’ Ne gindiko singogino piny, kendo jodongo gi Jo-Lawi kaachiel gi jodolo noketo lwetgi e wechego kaka joneno.