Cali apa cisila ica myaka 70 ukufuma pano Aina Izlaeli yaswililile uku Yelusalemu, lelo ala yamwi yene yacili yakaikala umu vitungu vipusane pusane umu mpanga iya Pesya. Wenga pali yayo, a simapepo Ezila, uwasambilizyanga Masunde Yakwe Yeova. Ezila uvwile ukuti antu aali umu Yelusalemu yatakonkanga Masunde Yakwe Leza, fwandi walondanga ukuti akayaazwe. Umwene Alitakisesi uwa ku Pesya wamuneenyile ati: ‘Leza wakulenga ukuya na mano pakuti uwasambilizya Masunde yakwe. Pitanga, nupya usende yonsi aakulonda ukupita naawe.’ Ezila wakolonganike yonsi alondanga ukupita nawe uku Yelusalemu. Yapefile ukuti Yeova ayazwe yapite ningo, nupya yatandike ulendo.

Pa cisila ica myezi 4, yafisile uku Yelusalemu. Ya cilolo yaneenyile Ezila iyati: ‘Aina Izlaeli yata ukuvwila Yeova nupya yatwala anaci akapepa ya leza ya ufi.’ Uzye Ezila wacisile uli? Ezila wafukime ala na antu yakulolako nupya wapefile ati: ‘Yeova, watucitila ivintu ivingi, nomba itukuyembukila.’ Antu yalapile, nomba yatwalilile ukucita ivintu ivitaali ningo. Ezila wasoolwile aikolo na ya kapingula pakuti yaazwa antu apa ntazi zii. Pa myezi itatu iyalondelilepo, antu yonsi atapepanga Yeova yayazinzile umu Yelusalemu.

Pa cisila ica myaka 12, yakuuzile cipya cipya ilinga ilya musumba uwa Yelusalemu. Fwandi Ezila wakolonganike antu yonsi nu kuyabelengela Masunde Yakwe Leza. Lino Ezila wakupukwile ibuku, antu yonsi imilile. Walumbanyizye Yeova, nupya antu yonsi yakatwisye makasa pa kuzumilizyako. Lyene Ezila watandike ukubelenga nu kulondolola Masunde, nupya antu yakutikisyanga. Yazumile ukuti yaitalwisye kuli Yeova nupya kwene, fwandi yatandike ukulila. Uwanda uwalondelilepo, Ezila wayabelengile Masunde na yauze. Lyene ilwike  ukuti yaali nu kukwata Ukuzevya Kwa Nsakwe. Lilyo kwene sile yatandike ukupekanya ukuzevya kuko.

Pa manda 7 aakuzevya, antu yali sana ni nsansa nupya yataizye Yeova pa uzombozi usuma. Ukufuma umu manda yakwe Yoswa kutatazile ikuya Ukuzevya Kwa Nsakwe wakwe kuu kuno yakweti. Pa cisila ica kuzevya, antu yapefile iyati: ‘Yeova, watukuulwile umu uzya, kutupeela ivyakulya umu lwanga, nupya waatupeela impanga ii isuma. Lelo ilingi, tutakuvwilanga. Watutumilanga ya kasesema aakutucelula, nomba tutayuvwilanga. Nanti ciye vivyo, watuteekelelanga. Watwalilila ukwiusya ulayo uno walavile Abulahamu. Fwandi twalaya ukuti tumakuvwilanga.’ Yalemvile ulayo uno yalavile, nupya ya cilolo, Aina Levi, na ya simapepo yafwatikepo.