Vutuhu mua hitile miaka 70 tunde ha va hilukilile vaIsaleli ku Yelusalema, kasi kua kele vamo va lisanduokele mu vuangana vua Pelesia. Umo uavo ua puile sasendote ua lizina Ezela, kaha ua kele na ku longesa masiko a Yehova. Ezela ua muene ngecize vantu va kele ku Yelusalema ka va kele na ku kava Masiko, ngeci ua tondele ku yako a ka va kuase. Muangana ua Pelesia Aletazeleze ua mu lekele ngueni: ‘Njambi na ku hana mangana linga u longese Masiko eni. Katuka uye, kaha ambata vose va tonda ku ya nove.’ Ngeci Ezela ua likunguluile na vose va tondele ku hiluka ku Yelusalema. Va vundilile kuli Yehova linga a va niunge mu vungendzi vua laha, kaha va katukile.

Mu nima ya vingonde viuana, va ka hetele ku Yelusalema. Vakuluntu va ka lekele Ezela nguavo: ‘VaIsaleli va na muesa lisino kuli Yehova na ku ambata vampuevo ve ku lemesa vanjambi va makuli.’ Vika ua lingile Ezela? Ezela ua tsikamene ku lutue lua vantu, kaha ua vundila ngueni: ‘Yehova, u na tu lingila viuma via vingi cikuma, vunoni tu na vulumuna kuli ove.’ Kaha vantu va liveyele, vunoni kasi va tualeleho ku linga viuma via ku pihia. Ezela ua hanguile vakuluntu na vangazi linga va tale ha vimpande viaco. Mu nima ya vingonde vitatu, vose ka va kele na ku lemesa Yehova va va hiluisile ku vifuti viavo.

Mua hitile miaka likumi na ivali. Vunoni mu ntsimbu yaco, vivumbe via Yelusalema va vi tunguluile. Ngeci Ezela ua kunguluile vantu vose ku lipela lia mbunga na ku va tandela Masiko a Njambi. Omo Ezela ua fukuile livulu, vantu vose va katukile. Ua sangalele Yehova, kaha va katuile mavoko avo va muese ngecize va na tava. Kaha Ezela ua tandele na ku lombolola Masiko, oku vantu va mu halakana vuino. Va litavelele ngecize va sezele Yehova lueka naua, ngeci va lilile. Lia mukuavo, Ezela ua tualeleleho ku va tandela Masiko. Va tantekeyele ngecize va pandele ku linga Ciuano ca Vintsingi muomu ntsimbu yaco ya kele ku hiehi. Ngeci mu ntsimbu ize vene va putukile ku liviukisila.

Mu matangua atanu na avali a ciuano, vantu va viukilile na ku santsela Yehova omo lia ku tia vimbuto via vingi. Ka  kua kele Ciuano ca Vintsingi ca lifuile na cize ci va lingile, tunde ku matangua a Yehosua. Mu nima ya ciuano, vantu va likunguluile kaha va vundilile nguavo: ‘Yehova, ua tu ovuele ku vundungo, ua tu lisile mu vindinda, na ku tu hana eci cihela ca cili. Vunoni ku sua kumo, tua ku muesele lisino. Ua tumine vapolofeto mu ku tu mamuna, vunoni ka tua va halakanene. Vutuhu ngoco, ua muesele lukakatela lua ngozi kuli etu. Ua niungile cikulaheso cove kuli Avilahama. Ngeci vuovuno netu tua likuminia ku ku ononoka.’ Kaha va sonekele eci cikulaheso cavo, ngeci vamiata, vaLevi na vasasendote va hakeleko vitantekeyeso viavo.