Maske panotoya 70 xiuitl kema israeleuanij tlakuepilijtoyaj Jerusalén, sekij nojua itstoyaj ipan tlali Persia. Se tlakatl tlen nopaya itstoya, eliyaya Esdras, se sacerdote katli tlamachtiyaya Jehová iTlanauatiljuaj. Esdras kimatki katli itstoyaj Jerusalén amo kineltokayayaj Jehová iTlanauatiljuaj, yeka kinekiyaya kinpaleuiti. Tlanauatijketl Artajerjes kiiljuik: “ToTeotsij kichijtok xitlalnamiki uan kiampa titlamachtis iTlanauatiljuaj. Xia moaltepe uan xikinuika katli kinekisej yasej mouaya”. Esdras mosentilik ininuaya katli kinekiyayaj tlakuepilisej Jerusalén uan kiiljuijkej Jehová ma kinmokuitlaui ipan ojtli, uan teipa kistejkej.

Kema panok naui metstli, asitoj Jerusalén. Katli tlayakanayayaj nopaya kiiljuijkej Esdras: “Israeleuanij amo kineltokatokej Jehová uan mosiuajtijtokej ininuaya siuamej katli kinueyichiuaj teotsitsij”. ¿Tlake kichijki Esdras? Motlankuaketski ininixpa nochi maseualmej uan momaijtok, kiijtok: “Jehová, ta tlauel titechpaleuijtok uan tojuantij tlauel timitsixpanotokej”. Maske inijuantij moyolkuepkej, nojua kichiuayayaj tlen amo kuali. Yeka Esdras kiniljuik se keskij ueuejtlakamej uan tetlajtolsenkauanij ma kiitakaj tlen panoyaya. Ipan eyi metstli kinkixtijkej tlen Jerusalén nochi katli amo kinejkej kiueyichiuasej Jehová.

Panok 12 xiuitl. Uan ipan Jerusalén ya kitlamikualchijchijtoyaj nopa tepamitl. Esdras kinsentilik maseualmej ipan plaza uan kinpouilik toTeotsij iTlanauatiljuaj. Kema kitlapok nopa amatlajkuiloli kampa kiijkuilojtoya nopa Tlanauatili, nochi moketskej. Esdras pejki kiueyichiua Jehová, uan nochi momatlalankej, kiampa kinextijkej kinekiyayaj ma mochiua tlen Esdras kiijtojtoya. Teipa, Esdras kipojki nopa Tlanauatili uan kinixtomilik, uan nochi kuali kitlakakilijkej. Inijuantij kiitakej sampa kitlauelkajtoyaj Jehová uan pejkej mochokiliaj. Ualmostla, Esdras nojua kinpouilik nopa Tlanauatili. Israeleuanij kiitakej monekiyaya kichiuasej nopa Iljuitl tlen Pilxajkaltsitsij, yeka nimantsi pejkej kikualchijchiuaj tlen motekiuiskia ipan nopa iljuitl.

 Nopa iljuitl uejkajki chikome tonali uan israeleuanij tlauel yolpakiyayaj. Kitlaskamatilijkej Jehová pampa kuali tlaelki ipan ininmil. Ayokmo kichijtoyaj nopa Iljuitl tlen Pilxajkaltsitsij, kej kema Josué nojua itstoya. Kema nopa iljuitl tlanki, mosentilijkej uan momaijtojkej, kiijtojkej: “Jehová, ta titechmakixtik kema tlauel techtlaijiyouiltiyayaj. Titechtlamakak kema tiitstoyaj ipan uaktok tlali uan titechmakak ni kuali tlali. Uan tojuantij miakpa timitsixpanotokej. Maske tikintitlanki miakej tlajtolpanextianij, amo tikinneltokakej. Uan ta tijpixki ueyi moyolo touaya. Amo tikilkajtok tlen tikiljuik Abraham. Nama, timokauaj kena timitsneltokasej”. Israeleuanij kiijkuilojkej tlen kiijtojtoyaj uan tlayakananij, levitas uan sacerdotes kitlalilijkej se sello kampa kiijkuilojkej tlen kichiuaskiaj.