Painga paano makore anokwana kuita 70 vaIziraeri no vahwirira ku Jerusarema, asi vamweni vainga vacagara mu mativi amweni o Umambo wo Persia. Umwe wakona wainga mupiri Esdra, uwo waijijisa mutemo wa Jehovha. Esdra wakazwa kuti vandhu vainga mu Jerusarema avacaiteverera mutemo, ngo kudaro iyena waida kuenda kovabesera. Mambo wo Persia waidanijwa Artaserse wakati: ‘Mwari wakaita kuti uve no ungwaro kuti ukwanise kujijisa mutemo wake. Endai zve torai ariwese anoda kuenda na iwewe.’ Esdra wakasongana no vese vaya vaida kuhwirira Jerusarema. Vakaita mukumbiro kuna Jehovha kuti avangwarire pa hwendo hwavaida kuita, perapo vakaenda.

Vakaguma ku Jerusarema no pakhirira mweji murongomuna. Vatungamiriri vainga kondhoyo vakabvunja Esdra kuti: ‘VaIziraeri avazivi kuteverera mutemo wa Mwari zve vakacadha no vanakaji vanonamata zvimwari zvo manyepo.’ Esdra wakaitenyi? Pambeji po vandhu Esdra wakagwadama zve wakaita mukumbiro eciti: ‘Jehovha, makatiitira zvakawanda, asi takamushaishira.’ Vandhu vakatendeuka, asi vakaramba veciita zviro zvicikazivi kunaka. Esdra wakasana vakuru no vatongi kuti vave pambeji po zviro zvondhozvo. Pa mweji mutatu jakatevera, vese vainga vacikanamati Jehovha vakagogomehwa.

Pakakhirira 12 o makore. Pa mukuvo wondhowo, mufimbiji jo Jerusarema jainga javakiswa. Ngo kudaro, Esdra wakaunganija vandhu vese zve wovaverengera mutemo wa Mwari. Paakazaura mutemo, vandhu vakamuka voima. Iyena wakakuja Jehovha zve ivona vakamusa nyara javo vecitenderana naye. Perapo, Esdra wakaverenga no kusanangura mutemo zve vandhu vainasa kuzwisisa. Ivona vakatendera kuti vainga vakaphurusa mutemo wa Jehovha zve vakatanga kurira. Njiku yakatevera, Esdra wakavaverengerazve zviro zvizinji zvo mutemo. Ivona vakajija kuti ngo kukasika ivona vaidikana kuita mabuso wo mucaca. Ngo kukasika vakatanga kunasirira mabuso wondhowo.

Pa njiku yo cinomwe yo mabuso awo, vandhu vakadakara zve vakabonga Jehovha ngo kukomborera zvirimwa zvavo.  Akuzivi kuvazve no mabuso akaezana na aya mu njiku ya mambo Joshuwa. Pakupera ko mabuso, vandhu vakaungana zve voita mukumbiro kuna Jehovha veciti: ‘Jehovha makatiponesa kubva mu ushoko, makatipa zvokuha patainga muzvipare, zve makatipa nyika iyi yakanaka maningi. Asi kuphinda no kuphinda, tinomushaishira. Makatumira maporofita kuti atingwaje, asi atizivi kuzwira. Pikija zvakadaro, muciri kusengerera. Mwakaita zvamakagondesa kuna Abhirahama. Wari tiri kugondisa kuti tinozomuzwira.’ Ivona vakatara pasi zvigondiso zvavo, perapo vatungamiriri, vaRevi no vapiri vakadira cidhindo.