Ikipiya kanaj 70 xiuitl ika miyekej israelitas yonokuepkaj Jerusalén, san ika, sekimej ok chantiyaj miyekan ipan Persia. Semej itech yejuamej katka se teopixki itoka katka Esdras, akin otemachti iTlanauatil Jehová. Yejua okimat ika akin nemiyaj Jerusalén xkitlakamatstoyaj Tlanauatijli niman okinek kinpaleuis. Tekiuaj persa Artajerjes okijli: “MoTajtsin okichiuj xpiya tlamachilistli niman ijkon xtemachti iTlanauatil. Xkuika akin kinekis mouan yas”. Esdras okinsentlali nochimej akin kinekiyaj nokuepaskej Jerusalén. Okitlajtlanilijkej Jehová makintlajpiya ipan ojtli niman oyajkej.

Naui metstli sakin, oajsikej Jerusalén. Akin ueyixtoyaj itech ueyikalpan okijlikej Esdras: “Israelitas xokitlakamatkej Jehová niman yononamiktijkej imiuan siuamej akin kiueyichiuaj tajtsitsintin”. ¿Tlenon okichiuj Esdras? Imixpan nochimej, onotlakuankets niman okichiuj teoyotl, okijto: “Jehová, tejua yotikchiuj miyek topampa. San ika, tejuamej yotitlajtlakojkej motechkopa”. Kalpan onoyolkuep, san ika, ok kichiujtoyaj tlen xkuajli. Esdras okintlapejpeni tlayekankej niman jueces makitakan tlenon panouaya. Ipan yeyi metstli, akin xkinekiyaj kiueyichiuaskej Jehová, okinkixtijkej.

Opanokej 12 xiuitl. Itepanuan Jerusalén okinyektlalijkej. Kuakon Esdras okisentlali kalpan niman okinpouili iTlanauatil toTajtsin. Ijkuak Esdras okitlapo amoxtli, kalpan onotelkets. Yejua okiueyichiuj Jehová niman yejuamej okajkokej imauan ijkon okiteititijkej ika kiseliayaj tlen onoijto. Sakin, Esdras okipouj niman otetomili Tlanauatijli. Kalpan kuajli okikak niman okasikamat ika oksejpa yokitlalkauijka Jehová niman ochokak. Uajmostla, Esdras ok okinpouili Tlanauatijli. Yejuamej okasikamatkej ika nonekiya kipanoltiskej Iluitl itoka Cabañas. Nimantsin opeuj noyektlaliaj ika kipanoltiskej iluitl.

 Iluitl ouejkauj chikome tonajli, kalpan melak opak niman okitlasojkamachili Jehová pampa miyek tlen okipixkak. Xok ijki kuajchiujtiayaj Iluitl itoka Cabañas, ken ipan itonaluan Josué. Ijkuak otlan iluitl, kalpan onosentlali niman okijto ipan teoyotl: “Jehová, tejua otitechmakixti kampa titlakeualtin katkaj, otitechtlakualti ipan tlaluaktli niman otitechmakak yejuin kualtsin tlajli. San ika, miyekpa xotimitstlakamatkej. Maski otikintitlan moteotlajtokauan matexchikajkanotsakan, xotikinkakisnejkej. Maski ijkon, otitechijyoui. Xotikilkauj tlen otikijli Abrahán tikchiuas. Aman timitsijliaj ika timitstlakamatiskej”. Kalpan okijkuilo tlen okijto niman akin ueyixtoyaj, levitas niman teopixkej okitlalilijkej insello.