Ízrel dineʼé Jerúsalemgóó aníjiiskaidóó tsostsʼidiin nááhai, ákondi Pérzha hahoodzogi łaʼ tʼahdii kéédahojitʼı̨́. Łaʼ Ézra joolyé, éí nááʼiiłniihii jílı̨́ áádóó Jiihóvah bibee hazʼáanii yínaʼniłtinii jílı̨́. Ézra éí Jerúsalemgóó anáhaaskaiígíí bee hazʼáanii doo yikʼeh dahółʼı̨́ı̨́góó baa hozdiiztsʼą́ą́ʼ, áko akǫ́ǫ́ deesháałgo bíká adeeshwoł jiniizı̨́ı̨́ʼ. Pérzha biNaatʼáanii Artazérksiiz áháłní: ‘God bibee hazʼáanii bee naʼnitin doo biniyé honiiyą́ągo ániilaa. Nílááh, tʼáá háíshı̨́ı̨́ akǫ́ǫ́ nídeeshdááł nízinígíí bił Jerúsalemgóó nááhkah.’ Jerúsalemgóó nídeeshdááł danízinígíí bił ahíjiikai, áádóó akǫ́ǫ́ yiikahgo nihaa áhólyą́ą doo dajiníigo Jiihóvah bichʼįʼ sodazdoolzin.

Dı̨́ı̨́ʼ nídeezidgo Jerúsalemdi jíkai. Bídahólníhígíí Ézra ádeiłní: ‘Ízrel dineʼé Jiihóvah doo yikʼeh dahółʼı̨́į da áádóó sáanii edaʼalyaii deidósinii beʼasdzą́ą́ ádeileʼ.’ Ézra haa jiidzaa? Diné bidáahgi nitsizhdinígoʼ áádóó Jiihóvah bichʼįʼ sozdoolzingo ájíní: ‘Jiihóvah, ląʼí bee nihíká íínílwod, ákondi nichʼįʼ nidaʼayiilzííh.’ Díí deidiiztsʼą́ąʼgo ádá nídaʼookąąh, ákondi doo yáʼátʼéehii tʼahdii yaa naakai. Yaa naakaiígíí baa nidazhdínóotaał biniyé Ézra éí elders dóó ándahwiiʼaahii níínínil. Tááʼ nídeezidgo, Jiihóvah dólzin doo deinízinígíí níwohjįʼ dabiʼdooʼniid.

Kótʼéego hoolzhishgo naaki tsʼáadah nááhai. Jerúsalem bináʼástłʼin yę́ę ałtso hashtʼenályaa. Kin dah shijaaʼ ałníiʼgi Ézra diné áłah ájiilaa áádóó God bibee hazʼáanii bichʼįʼ jííłtaʼ. Naaltsoos yisdisii ąą áyiilaago tʼáá ałtso diné deizįʼ. Jiihóvah yaa haniihgo haadzíiʼgo tʼáá ájíłtso hoł danilı̨́įgo dah dazhdiilniiʼ. Ézra bee hazʼáanii hachʼįʼ yółtaʼ áádóó ááhyiłníigi yee hoł halneʼ, áko hazhóʼó dajíistsʼą́ą́ʼ. Tʼáá aaníí Jiihóvah bitsʼáhaakai dajiní áádóó bikʼee yínííł dajílı̨́įgo dajicha. Biiskání Ézra bee hazʼáanii łaʼ náá  yííłtaʼ. Áko chahaʼoh hodílzin ádazhdoolííł bichʼįʼ hoolzhishgo hoł béédahoozin. Hodílzin ádoolnííł biniyé tsı̨́įłgo bidazhdeeshnish.

Nizhónígo aneestʼánígíí baa hoł dahózhǫ́, áádóó Jiihóvah bichʼįʼ ahééh dazhnízingo tsostsʼid yiską́. Jáshowa hiná yę́ędą́ą́ʼ éí díí chahaʼoh hodílzin tʼáá ádajiilaa ńtʼééʼ. Hodílzin ííłtsogo diné áłah silı̨́įʼgo Jiihóvah yichʼįʼ sodadoolzingo ádaaní: ‘Naalteʼ bitsʼą́ą́dę́ę́ʼ yisdá nihíínínil, honoojíidi chʼiyáán hólǫ́ǫgo nihá íínísin, áádóó díí kéyah hózhónígíí nihaa dííníʼą́. Ákondi doo akʼeh dahoniilʼı̨́ı̨́góó hoolzhish. Ná dahalneʼé doo deisíníiltsʼą́ąʼ da. Ákótʼée ndi nihichʼįʼ haʼíínílní. Éíbraham bee bichʼįʼ háínídzííʼ yę́ę doo łahgo áníléeh da. Nihí éí nikʼeh dahoniilʼı̨́į doogo bee ádee hadadiidzih.’ Díí ádee hadaasdzíʼígíí naaltsoos yisdisii bikááʼ ályaa áádóó bídahólníihii, Líívai dineʼé, dóó náádaʼiiłniihii bízhiʼ yee lą́ daʼasłı̨́ı̨́ʼ.