Tunde etyi ovanthu vamwe vakondoka ko Jelusalei palambale omanima 70, mahi vamwe nkhele ankho vakala kovilongo vielikalela Vituminwa no Persia. Umwe puvo omunakwa utiwa o Esdra ankho ulongesa ovanthu Ovitumino via Jeova. Esdra eivi okuti ovanthu mo Jelusalei kavekahi nokulandula ovitumino via Huku, pahe ankho uhanda okuenda-ko opo ekevekuateseko. Ohamba yo Persia Artaxerxe aimupopila okuti: ‘Huku yove wekuavela ounongo wokulongesa Ovitumino viae. Enda inkha pena ou uhanda okuenda nove enda nae.’ Esdra aongiya ovanthu aveho vahanda okukondoka ko Jelusalei. Avelikuambela ku Jeova opo ayakulile oungendi wavo iya avaende.

Etyi palamba onohanyi ononkhuana avehiki ko Jelusalei. Ovatumini avapopila Esdra okuti: ‘Ova Isilayeli kavetavelele ku Jeova iya velinepa novakai vafenda ono huku mbomatutu.’ Oityi Esdra alinga? Waikila konongolo komutwe wovanthu elikuambela okuti: ‘Jeova wetulingila ovipuka ovinyingi, mahi onthue tualinga vali onkhali.’ Ovanthu avelivele mahi no ngotyo avatualako nokulinga ovipuka vihaviukile. Esdra aholovona ovakulu novakoyesi opo vatetulule otyitateka otyo. Etyi palamba onohanyi ononthatu, ovanthu vahafende Jeova avataatwa.

Apalambe omanima 12. Ovimato vio Jelusalei avipindulua-po. Esdra aongiya ovanthu aveho evetangela Ovitumino via Huku. Etyi aikula omukanda ovanthu aveho avakatuka. Esdra ahivilika Jeova iya ovanthu aveho avetavela. Putyina Esdra atanga nokuhangununa Ovitumino ovanthu aveho otyo vemutehelela nawa. Ova Isilayeli avaimbuka okuti kavetavelele vali ku Jeova iya avahimbika okulila. Onthiki onkhuavo, Esdra evetangela vali Ovitumino. Ova Isilayeli avaimbuka okuti omuvo wokulinga Otyipito Tyomakaka wehikapo. Avehimbika okulipongiya pala otyipito otyo.

 Otyipito tyalingwa mononthiki epandu-vali, ovanthu avahambukwa unene iya avapandula Jeova mokonda wayamba ovikuna viavo. Otyipito Tyomakaka valingile tyelifwa notyo, otyo tyina valingile ponthiki mba Josue. Konyima yotyipito otyo, ovanthu aveho aveliongiya iya Esdra elikuambela okuti: ‘Jeova, ove wetuyovola koupika, otuavela okulia moluhandya, tupu wetuavela otyilongo etyi otyiwa. Mahi ovikando ovinyingi onthue katukutavela. Ove wetutuma ovauli opo vetulondole, mahi otyo tuhetavela. No ngotyo wapua elundo. Tupu wafuisapo omulao wapopilile Abraiau. Pahe tuhanda okutavela kuove.’ Opo valekese okuti mavafuisapo etyi vapopia, avahoneka omukanda iya ovana va Levi no vanakwa avapake-po otyilimbo.