Israaʼelonni hedduun Yerusaalemitti erga deebiʼanii gara waggaan 70 kan darbe taʼus, tokko tokko amma iyyuu kutaawwan Bulchiinsa Faares garaa garaa keessa jiraatu turan. Isaan keessaa tokko luba Izraa jedhamuu fi Seera Yihowaa barsiisu dha. Izraan namoonni Yerusaalem keessa jiraatan Seericha hordofaa akka hin jirre waan beekeef, achi dhaqee isaan gargaaruu barbaade. Mootii Faares kan taʼe Artashaastaan, ‘Waaqayyo Seera isaa barsiisuu akka dandeessuuf ogeessa si godhe. Nama sii wajjin deemuu barbaadu kam iyyuu fudhadhuutii dhaqi’ isaan jedhe. Izraanis namoota gara Yerusaalemitti deebiʼuu barbaadan hundaa wajjin wal arge. Karaa isaanii isa dheeraa taʼe irratti akka isaan eeguuf gara Yihowaatti kadhannaa erga dhiheessanii booda deemsa jalqaban.

Jiʼoota afur booda Yerusaalem gaʼan. Bulchitoonni achiis, ‘Israaʼelonni Yihowaadhaaf hin ajajaman; akkasumas dubartoota waaqolii sobaa waaqeffatan fuudhaniiru’ jedhanii Izraatti himan. Izraan maal godhe ree? Izraan sabicha duratti jilbeenfatee, ‘Yaa Yihowaa, ati waan baayʼee nuuf gooteetta; nuti garuu si irratti cubbuu raawwanneerra’ jedhee kadhate. Namoonni sun yaada kan geddaratan taʼus, amma iyyuu wantoota sirrii hin taane godhu turan. Izraan dhimmoota kana akka ilaalaniif jaarsolii fi abbootii murtii filate. Jiʼoota sadii keessatti, warri Yihowaa hin waaqeffanne ni ariʼaman.

Waggoonni kudha lama ni darban. Yeroo kanatti dallaawwan Yerusaalemitti marsanii jiran deebifamanii ijaaraman. Kanaaf, Izraan Seera Waaqayyoo isaaniif dubbisuuf, sabicha gara waltajjii uummataatti walitti qabe. Yommuu Izraan kitaabicha banu sabichi ol kaʼee dhaabate. Innis Yihowaa kan jajate siʼa taʼu, isaanis irratti walii galuudhaan harka isaanii ol kaasan. Achiis Izraan yommuu Seericha dubbisee isaaniif ibsu, sabichi xiyyeeffannaadhaan dhaggeeffata ture. Isaanis deebiʼanii Yihowaa irraa akka fagaatan amananii kan fudhatan siʼa taʼu ni booʼan. Guyyaa itti aanutti Izraan Seericha irraa wanta dabalataa isaaniif dubbise. Isaanis utuma baayʼee hin turin Ayyaana Daasii  ayyaaneffachuu akka qaban hubatan. Yeruma sana ayyaanichaaf qophii gochuu jalqaban.

Sabichi gammadee oomisha gaarii argameef guyyoottan ayyaana sanaa torbaaf Yihowaa galateeffate. Bara Iyaasuutii jalqabee Ayyaanni Daasii akkasii kabajamee hin beeku. Ayyaanicha booda sabichi sassaabamee kadhate: ‘Yaa Yihowaa, ati garbummaa jalaa nu baasteetta; lafa onaa keessatti nu soorteetta; biyya bareedduu taate kanas nuuf kenniteetta. Nuti garuu irra deddeebinee utuu siif hin ajajamin hafne. Ati nu akeekkachiisuuf raajota kee nuuf ergiteetta; nuti garuu si hin dhaggeeffanne. Taʼus ati nuuf obsite. Waadaa Abrahaamiif galte eegdeetta. Amma garuu siif ajajamuuf waadaa galla.’ Isaanis waadaa galan kan barreessan siʼa taʼu, bulchitoonni, Lewwoonnii fi luboonni irratti mallatteessan.