Ele e lelehr sounpar 70 ni ahnsou me pali laud en mehn Israel ko pwuralahng Serusalem, ahpw ekei irail mihmihte nan ekei sahpw kan nan Wehin Persia. Emen irail iei samworo me adaneki Esra, me kin padahngki sapwellimen Siohwa Kosonned. Esra esehda me aramas ako nan Serusalem sohte kin idawehn Kosonnedo, oh e men kohla sewese irail. Nanmwarki en Persia Ardaserksihs ahpw ndaiong ih: ‘Koht ketikihong uhk loalokong pwe ken kak padahngki sapwellime Kosonned. Eri kohla oh kahrehda sohte lipilipil me men iang uhk.’ Esra eri tuhwong koaros me men iangih pwurala Serusalem. Irail eri kapakapohng Siohwa en ketin pereirail nan arail seiloak reirei, oh irail eri mweselda.

Sounpwong pahieu mwuri, irail ahpw lella Serusalem. Lapalap en wasa ko ahpw ndaiong Esra: ‘Mehn Israel kan sapeikiongalahr Siohwa oh pwoudikihda lih akan me kin kaudokiong koht likamw akan.’ Eri, dahme Esra wia? Mwohn aramas ako, Esra kelepwikihdi oh kapakap: ‘Maing Siohwa, komw ketikihongkihter soahng tohto, ahpw se wiewiahte dihp ong komwi.’ Aramas ako koluhla, ahpw irail kin wiewiahte soahng kan me sohte pwung. Esra eri pilada ohl mah kan oh sounkopwung kan en kin tetehk soahng pwukat. Erein sounpwong siluh, irail akan me sohte kin kaudokiong Siohwa pekederpeseng.

E dauliher sounpar eisek riau. Nan ahnsou pwuko, dihd en Serusalem kan pwurehng wiawihda. Esra eri kapokonepene aramas ako nan wasahn tuhpeneo pwehn wadekohng irail Kosonned en Koht. Ni ahnsou me Esra pahkpeseng pwuhko, aramas ako kesihnenda. E kapinga Siohwa, oh aramas ako kauwada pehrail ko pwehki re pwungki. Esra eri wadek oh kawehwe Kosonnedo, oh aramas ako rongorong kanahieng. Irail wehkada me irail pwurehng kesehla Siohwa, oh irail eri sengiseng. Mwurin rahno, Esra pil pwurehng wadekohng irail ekei kisehn Kosonnedo. Irail eri esehda me ahnsou keren irail pahn anahne wia Kasarawi en Impwal kan. Ni ahnsowohte, irail tepida kaunopada ong kasarawio.

 Erein rahn isuh en kasarawio, aramas ako pereperen oh kalkalahngankihong Siohwa arail wahnsapw kaselel kan. Saikinte Kasarawi en Impwal ehu me duwehte met sangete ni mwehin Sosua. Mwurin kasarawio, aramas ako ahpw pokonpene oh kapakap: ‘Siohwa, komw kapitasang kiht nan kalidu, kamwenge kiht nan sapwtehno, oh ketikihong kiht sahpw kaselel. Ahpw se kin kalapw sapeikiong komwi. Komw ketin kadarodo soukohp kan pwe ren kaweid kiht, ahpw se sohte kin rong irail. Ahpw komw kin ketin kanengamah. Komw ketin kolokolete omw inowo ong Eipraam. Met se inoukidahr me se pahn peikiong komwi.’ Irail eri ntingihedi arail inowo, oh kaun ako, mehn Lipai kan, oh samworo kan kadehdehkier neirail sidamp kan.