Israelïtakuna Jerusalenman kutiyanqampitaqa 70 watanönam pasashqa karqan. Peru wakinqa Persia nacion gobernanqan markakunallachöran täräyarqan. Tsënömi Jehoväpa leyninkunata yachatsikoq sacerdöti Esdraswampis pasakurqan. Pëqa Jerusalenchö këkaqkuna Diospa leyninkunata mana cäsukïkäyanqanta wiyarirmi yanapakoq ëwëta munarqan. Tsëmi Persiapa reynin Artajerjes kënö nirqan: “Qamqa Dios yanapashuptikim leyninkunata cösa yachatsikunki. Tsënö këkarqa munaq kaqkunata pusharkur ëwë”. Tsënam Esdrasqa Jerusalenman kutita munaqkunata juntarqan. Y llapankunam imëkapitapis tsapëkunampaq Jehoväman mañakurir viajar qallëkuyarqan.

Chusku killa rurintam Jerusalenman chäyarqan. Y dirigentikunam Esdrasta kënö niyarqan: “Israelïtakunaqa Jehoväta mana cäsukurmi mana rasumpa dioskunata adoraq warmikunawan casakuyashqa”. ¿Y imatataq Esdrasqa rurarqan? Llapan israelïtakunapa puntanchö qonqurikïkurmi kënö mañakurqan: “Jehovä, qamqa imëkatam noqakunarëkur rurarqunki, peru noqakunaqa contrëkim jutsallakuyarqö”. Tsënam, llapankuna arrepentikuyarqan, peru mana alli rurëkunataqa manam chipyëpatsu jaqiyarqan. Tsëmi Esdrasqa respetashqa nunakunata y juezkunata mandarqan tsë asuntuta shumaq rikäyänampaq. Y kima (kimsa) killa rurinmi Jehoväta adorëta mana munaq kaqkunata qarqur ushayarqan.

Tsëpitaqa 12 watam pasarqan. Y tsë witsanmi Jerusalenpa perqankunata yapë sharkatsir ushariyarqan. Esdrasqa llapan israelïtakunatam pläzaman qayatsirqan Diospa leyninkunata leyipunampaq. Y tsë leykunata kichariptinmi llapankuna sharkuriyarqan. Tsënam Esdrasqa Jehoväta alabarqan, y israelïtakunaqa acuerdu karmi makinkunata pallariyarqan. Tsëpitanam Esdrasqa leykunata leyirqan y entienditsikurqan. Y llapankunam shumaq wiyakuyarqan. Jehoväta kutin kutin jaqiriyanqanta yarparkurmi llapankuna waqayarqan. Waränin junaqpis Esdrasqa leykunata leyirmi sïguirqan. Tsëmi israelïtakunaqa cuentata qokuriyarqan Ramäda fiestata celebrayänan precisanqanta. Y jinan höram alistapakur qallëkuyarqan.

 Israelïtakunaqa qanchis junaqmi tsë fiestata kushishqa celebrayarqan. Y cosëchakuna alli kanqampitam Jehoväta agradecikuyarqan. Josuë kawanqan witsampitam tsë fiestata rurashqatsu kayarqan. Fiesta pasariptinmi llapankuna juntakärir kënö mañakuyarqan: “Jehovä, qammi esclävu kayanqäpita librayämarqëki. Tsunyaqchömi pachäkuna qarayämarqëki y kë shumaq markatam qoyämarqëki. Peru noqakunaqa kutin kutinmi cäsuyarqoqtsu. Y willakoqnikikunata kachamuptikipis manam wiyakuyarqötsu. Peru qamqa pacienciawanmi tratayämarqunki. Manam qonqarirqunkitsu Abrahanta äninqëkita. Tsëmi kananqa qamta wiyakuyänaqpaq äniyaq”. Tsë änikïninkunatam israelïtakunaqa qellqayarqan, y dirigentikuna, levïtakuna y sacerdötikunam juk sëlluta churayarqan.