Achca judiocuna Jerusalenman tigrashcamantaca ñami 70 huatacuna pasashca carca. Pero huaquincunaca Esdras shinami Persia pueblocunapi causacurcacunaraj. Esdrasca Dios mandashcacunata yachachij sacerdotemi carca. Paica Jerusalenpi causajcuna Diospaj mandashcacunata mana cazucujtami yachaj chayarca. Chaimantami paicunata ayudanata munarca. Rey Artajerjesmi Esdrastaca, ‘Diosca paipaj mandashcacunata yachachichunmi canmanca yachaita cushca. Canhuan risha nijcunata apashpa chaiman rilla’ nircami. Esdrasca risha nijcunataca tucuicunatami tandachirca. Shinallataj paicunata Jehová Dios cuidachun mañashpami Jerusalenman tigrarcacuna.

Chuscu quillacunapimi Jerusalenman chayarcacuna. Mandajcunaca Esdrastaca, ‘israelitacunaca Diosta mana cazushpami yanga dioscunata adoraj huarmicunahuan cazarashcacuna’ nircacunami. Chaimi paica tucuicunapaj ñaupajpi cungurishpa, ‘Jehová canca achca allicunatami cushcangui. Pero ñucanchijca juchapimi urmashcanchij’ nishpa mañarca. Gentecunaca arrepintirircacunami. Pero, allita rurangapaj ayudachunmi minishtircacuna. Chaimantami Esdrasca cunaj yuyajcunata, juezcunata gentecuna imata ruracushcata ricuchun churarca. Quimsa quillacunapica Jehovata mana adorasha nijcunataca llujshichishpami cacharcacuna.

12 huatacuna qꞌuipami Jerusalén pircacunata cutin shayachishpa tucuchircacuna. Esdrasca Dios mandashca librota leyingapajmi gentecunata shuj plazapi tandachirca. Chai librota Esdras pascajpica tucuicunami shayarircacuna. Esdras Jehová Diosta alabajpica paicunapaj maquicunata alzashpami chashna cachun nircacuna. Qꞌuipaca Dios mandashcacunata leyishpa Esdras intindichicujpica tucuicunami alli uyacurcacuna. Jehovamanta cutin caruyashcata cuentata cushpami huacarcacuna. Cayandij punllapishmi Esdrasca Dios mandashcacunata leyishpa catirca.  Chaimi israelitacunaca ramacunahuan rurashca Chujlla Fiestata rurana cashcata yacharcacuna. Chai fiestata rurangapajmi utca allichirircacuna.

Chujlla fiestataca achcata cushicushpami 7 punllacunata rurarcacuna. Alli cozicha tiyashcamantapish Diosta pagui nircacunami. Chujlla fiestataca Josué causacuj punllacunamantami mana rurashcacuna carca. Chai fiesta tucurijpica, ‘Yaya Dioslla esclavocuna cajpimi ñucanchijta quishpichircangui. Shitashca pambapipish carashpami cai sumaj allpatapish curcangui. Pero ñucanchijca canta mana cazurcanchijchu. Profetacunata huillachun cachajpipish mana uyarcanchijchu. Yallitaj cꞌuyaj cashpami Abrahamman nishca shimicunataca pajtachircangui. Cunanca canllatami cazushun’ nishpami mañarcacuna. Chai shimicunata quillcajpica mandajcuna, levitacuna, sacerdotecunapish firmashpami shuj sellota churarcacuna.