70 watamantam Israel runakunaqa Jerusalenman kutirqaku. Wakinkum ichaqa hinallaraq Persia nacionpi yacharqaku. Hukninmi karqa Jehova Diosmanta yachachiq sacerdote Esdras. Paymi Jerusalenpi Diosta mana kasukuptinku yanapaq riyta munarqa. Persia nacionta kamachiq Artajerjesñataqmi nirqa: “Munaqkunawan Jerusalenman riruy. Diosmi yachayta quykusunki kamachikuyninmanta yachachinaykipaq”, nispa. Chaynapim Esdrasqa riqmasinkunawan allinlla chayanankupaq Diospa yanapakuynintaraq mañakurqaku.

Tawa killamanta Jerusalenman chayaruptinkum jefekuna Esdrasman kaynata willarqaku: “Jehova Diosta qipancharuspankum taytacha-mamacha yupaychaq warmikunawan casarakurunku”, nispa. Esdrasñataqmi lliw runakunapa qayllanpi qunqurakuykuspan Diosta mañakurqa: “Tukuy imata quwachkaptikikupas qayllaykipim huchallikuruniku”, nispa. Israel runakunaqa wanakuspankupas hinallam mana allinta ruwarqaku. Chaymi Esdrasqa juezkunatawan autoridadkunata akllarqa mana kasukuqkunata qarqunankupaq.

12 wata pasaruptinmi Jerusalenpa muyuriqninta pirqaytapas musuqmanta tukururqaku. Chaymi Esdrasqa lliw Israel runakunata huñurachispan Diospa kamachikuyninta leepurqa. Chayta uyarispankum Israel runakunaqa sayarirqaku. Esdrasñataqmi kusikuywan Jehova Diosta hatuncharqa. Paykunañataqmi makinkuta huqarispanku Diosta hatuncharqaku, hinaspapas Esdraspa yachachisqanta uyarispankum huchankuta riqsikuspa waqarqaku. Paqarinnintinpas paykunapaq hinalla leepuptinmi yacharurqaku Ramada sutiyuq fiesta ruwanankumanta, chaypaqmi allichakuyta qallaykurqaku.

Kusisqallañam 7 punchaw Ramada fiestata ruwaspanku, kawsayninku allin qispisqanmanta Diosta agradecekurqaku. Manam chaynataqa ruwarqakuchu Josueypa tiemponmantapacha. Chay fiesta tukuruptinmi huñunakuruspanku  Jehova Diosta mañakurqaku: “Jehova, qanmi Egiptomanta hurqumuwarqankiku. Chunniq urqupim mikuchiwarqankiku, hinaspam kay sumaq allpata quwarqankiku. Qanmanta willawaqniykuta mana kasukuptiykupas achka kutipim llakipayaykuwarqankiku. Qamqa Abrahanwan rimasqaykiman hinam ruwarqanki. Kunanmantaqa kasukullasqaykikum”, nispa. Kasukunankupaq rimasqankuta qillqaspankum sacerdotekuna, levitakuna hinaspa jefekuna sellaspanku firmarqaku.