Huaquin Israelitacuna Jerusalenman cutin tigrashcamandaca casi 70 huatacunami yalishca carca. Shinapash huaquin israelitacunaca Persia llactapa shuj shuj pushtucunapi causanajurcarami. Persia llactapi causajcunahuanga Jehová Diospa Leycunata yachachij Esdras sacerdotepashmi carca. Paica Jerusalenbi causaj gentecuna Diospa mandashcacunata na cazunajushcatami yachaj chayarca. Chaimi Esdrasca Israelitacunata ayudangapaj Jerusalenman ringapaj munarca. Persia llactapa rey Artajerjesca Esdrastaca nircami: Taita Diosmi candaca paipa Leyta yachachichun ali yachaita cushca. Shinaca Jerusalenman canhuan ringapaj munajcunata pushashpa rilla nishpa. Chaimi Esdrasca Jerusalenman tigrangapaj munajcunahuan tandanajushpa Jehovata mañanajurca, caruta rinami canchi tucuicunata cuidashpa pushahuangui nishpa.

Chuscu quillacuna jipami Jerusalenmanga chayarca. Jerusalenbi cati mandajcunaca Esdrastaca cashnami nirca: Israelitacunaca Jehovata na cazushpami yanga dioscunata adoraj huarmicunahuan cazarashca nishpa. Chaita uyashpaca ¿Esdrasca imatashi rurarca? Esdrasca tucui israelitacunapa ñaupajpi cungurishpami cashna mañarca: Ñucanchimanda ali cosascunatalla rurajpipash Jehová Dioslla ñucanchica canba ñaupajpica nalitallami rurashcanchi nishpa. Israelitacunaca arrepintirishpapash nali cosascunata rurashpa catircarami. Chaimi Esdrasca israelitacunamanda picunalla nalicunata rurajushcata yachangapaj juezcunata, ñaupaman pushaj jaricunatapash agllarca. Shinami quimsa quilla jipa Jehovata na adorangapaj munajcunataca tucuillata llujchishpa cacharca.

Ñami 12 huatacuna yalishca. Jerusalén llactapa jatun pircacunataca cutinmi ña shayachishca. Chaimi Esdrasca Diospa Leyta uyachun tucuilla israelitacunata plazapi tandachirca. Jehová Dios mandashpa escribichishca librota Esdras pascajpica tucuilla israelitacunami shayarirca. Chai jipaca Esdrasca Jehovatami jatunyachirca. Chaimi israelitacunapash maquita alzashpa paicunapash cazungapaj munashcata ricuchinajurca. Jipamanga Esdras Diospa Leyta liishpa intindichijpimi israelitacunaca ali uyanajurca. Paicunaca Jehovamanda cutin caruyashcata cuenta japishpami huacanajurca. Cayandi punllapashmi Esdrasca Diospa Leyta liishpa catirca. Chaipimi israelitacunaca Fiesta de las Cabañas nishcata ruranata cuenta japishpa tucuita segurai callarirca.

Chai fiestaca siete punllacunatami pararca. Chai punllacunapica israelitacunaca ninanda cushijushcami carca. Granocuna ali fucushcamandapashmi Jehovata pagui ninajurca.  Josué causajuj punllacunamandapachami Fiesta de las Cabañas nishcataca na rurashca carca. Ña chai fiesta tucurijpica tucuilla tandanajushpami cashna mañanajurca: Jehová Dioslla canmi ñucanchitaca esclavo canamanda cacharichishpa, chaquishca pambacunapipash micunaguta carashpa cuidarcangui. Cai ali alpatapash ñucanchiman cushcangui. Shinapash cutin cutinmi candaca na cazushcanchi. Profetacunata cachamujpipash paicunata na uyashpami na cazurcanchi. Na uyangapaj munajpipash na ñapash fiñarircanguichu. Shinapash, Abrahanman imata carasha nishcatapash na cungashpami pactachircangui. Cunanmanda vichaimanga tucuipimi cazushun nishpa. ‘Chai ari nishcata escribishpami cati mandajcunapash, levitacunapash, israelitacunata ñaupaman pushajcunapash paicunapa shutita churarca’.