Накхле околу 70 берш откеда повише Израелција иранѓе пе ко Ерусалим. Ама несаве панда живинена сине ко различна тхана ко персиско царство. Јекх лендар сине о свештенико о Езра кова со сикавела сине е народо башо е Јеховаскоро закони. О Езра шунѓа кај о мануша ко Ерусалим на шунена е Девлескоро закони, хем адалеске мангља те џал ки ленде хем те поможинел лен. О персиско цари, о Артаксеркс, вакерѓа леске: „О Девел керѓа тут те ове мудро те шај те сикаве е манушен башо лескоро Закони. Џа, хем туја нека авел секој со мангела“. О Езра аракхља пе сариненцар со мангле те иранен пе ко Ерусалим, молинѓе пе е Јеховаске те аракхел лен ко адава баро друмо хем цидинѓе.

Пало штар масекија, ресле ко Ерусалим. О кнезија вакерѓе е Езраске: „О Израелција на шунѓе е Јехова хем леле песке ромњен со служинена ховавне девленге“. Со керѓа о Езра? Англо са о народо пело ко кочија хем молинѓа пе: „Јехова, ту керѓан бут буќа аменге, а амен бут грешинѓем туке“. Иако о мануша кајнѓе пе, ола панда керена сине буќа со на сине исправна. О Езра биринѓа старешине хем судие те дикхен сој тано о проблеми. Сарине со на служинена сине е Јеховаске, трине масеконге сине палдиме адатхар.

Накхле 12 берш. Џикоте трајнена сине адала берша, о ѕидија околу о Ерусалим сине палем градиме. О Езра кхединѓа е манушен ко плоштад те читинел ленге таро е Девлескоро закони. Кеда пхравѓа о лил, о народо уштило ко пре. О Езра почминѓа те фалинел е Јехова, а ола ваздинѓе пумаре васта кај согласинена пе леа. О Езра читинѓа хем објаснинѓа о Закони, а о мануша шунена ле сине. Ола признајнѓе кај цидинѓе пе таро Јехова, хем почминѓе те ровен. О јавер диве, о Езра палем читинела сине таро Закони. Ола халиле кај панда хари ваљани те славинен о Празнико е сениценгоро. Адалеске, одма почминѓе те спреминен пе е празникоске.

 Џикоте славинена сине ефта диве о празнико, о народо сине бут радосно хем благодарно е Јеховаске баши шукар жетва. Асавко Празнико е сениценгоро на сине панда таро време е Исус Навинескоро. Пало празнико, о мануша кхединѓе пе хем молинѓе пе: „Јехова, ту спасинѓан амен таро ропство, денѓан амен хајбаске ки пустина хем денѓан амен акаја шужи пхув. Ама амен стално грешинаја сине туке. Бичхалеа сине аменге пророкија те опоменинен амен, ама амен на шунаја лен сине. Ту сиан сине бут стрпливо аменцар хем на бистерѓан адава со ветинѓан е Авраамеске. Акана амен ветинаја кај ка ова туке послушна“. Ола пишинѓе адава со ветинѓе, а пало адава о кнезија, о левитија хем о свештеникија чхивѓе печати ко адава.