Nakhle okolu 70 berš otkeda poviše Izraelcija irangje pe ko Erusalim. Ama nesave panda živinena sine ko različna thana ko persisko carstvo. Jekh lendar sine o svešteniko o Ezra kova so sikavela sine e narodo bašo e Jehovaskoro zakoni. O Ezra šungja kaj o manuša ko Erusalim na šunena e Devleskoro zakoni, hem adaleske manglja te džal ki lende hem te pomožinel len. O persisko cari, o Artakserks, vakergja leske: „O Devel kergja tut te ove mudro te šaj te sikave e manušen bašo leskoro Zakoni. Dža, hem tuja neka avel sekoj so mangela“. O Ezra arakhlja pe sarinencar so mangle te iranen pe ko Erusalim, molingje pe e Jehovaske te arakhel len ko adava baro drumo hem cidingje.

Palo štar masekija, resle ko Erusalim. O knezija vakergje e Ezraske: „O Izraelcija na šungje e Jehova hem lele peske romnjen so služinena hovavne devlenge“. So kergja o Ezra? Anglo sa o narodo pelo ko kočija hem molingja pe: „Jehova, tu kergjan but bukja amenge, a amen but grešingjem tuke“. Iako o manuša kajngje pe, ola panda kerena sine bukja so na sine ispravna. O Ezra biringja starešine hem sudie te dikhen soj tano o problemi. Sarine so na služinena sine e Jehovaske, trine masekonge sine paldime adathar.

Nakhle 12 berš. Džikote trajnena sine adala berša, o zidija okolu o Erusalim sine palem gradime. O Ezra khedingja e manušen ko ploštad te čitinel lenge taro e Devleskoro zakoni. Keda phravgja o lil, o narodo uštilo ko pre. O Ezra počmingja te falinel e Jehova, a ola vazdingje pumare vasta kaj soglasinena pe lea. O Ezra čitingja hem objasningja o Zakoni, a o manuša šunena le sine. Ola priznajngje kaj cidingje pe taro Jehova, hem počmingje te roven. O javer dive, o Ezra palem čitinela sine taro Zakoni. Ola halile kaj panda hari valjani te slavinen o Prazniko e senicengoro. Adaleske, odma počmingje te spreminen pe e praznikoske.

 Džikote slavinena sine efta dive o prazniko, o narodo sine but radosno hem blagodarno e Jehovaske baši šukar žetva. Asavko Prazniko e senicengoro na sine panda taro vreme e Isus Navineskoro. Palo prazniko, o manuša khedingje pe hem molingje pe: „Jehova, tu spasingjan amen taro ropstvo, dengjan amen hajbaske ki pustina hem dengjan amen akaja šuži phuv. Ama amen stalno grešinaja sine tuke. Bičhalea sine amenge prorokija te opomeninen amen, ama amen na šunaja len sine. Tu sian sine but strplivo amencar hem na bistergjan adava so vetingjan e Avraameske. Akana amen vetinaja kaj ka ova tuke poslušna“. Ola pišingje adava so vetingje, a palo adava o knezija, o levitija hem o sveštenikija čhivgje pečati ko adava.